Coliseum

Adtong usang gabii akong nadunggan sa TV ang gisulti sa usa ka sports commentator. Matud niya: “There’s a snowballing of demand for a modern coliseum in Cebu City.”

Duna kuno’y nagkadaghang hangyo nga tukoran og modernong coliseum ang dakbayan sa Sugbo.

* * *

Sa tinuod lang hagbay na kitang nakadungog sa susamang hangyo dili lang gikan sa lumad nga mga Sugbuanon kun dili usab gikan sa pipila ka mga tigpaniid nga dili Sugbuanon.

Gani, suma pa sa daghang tigpaniid, mas maayo pa ang mga gagmay’ng siyudad sa mga suok nga dapit sa Mindanao kay nakapatukod og mga coliseum o sports centers nga angay nilang ikapasigarbo.

* * *

Dinhi sa ato sa Sugbu duna man tuod kita’y Cebu Coliseum apan matud pa sa mga sportswriters nato “panahon pa kini ni Flash Elorde ug ni Kosaka” ug pagaabangan ra kini sa tag-iya niini kun dunay dakong sports o ba kaha entertainment events.

* * *

Kini dili ato rang obserbasyon. Misangon ra kita sa maong mga obserbasyon ug sa maong mga hangyo nga unta kahatagan og seryosong pagtagad kini sa kadagkuan sa atong dakbayan.

Inigduwa sa PBA sa pipila sa mga dapit sa Mindanao, dili gyud kalikayan nga kita makadungog og komentaryo sa Sugbuanong tumatan-aw sama sa: “May pa kining gamay’ng siyudad duna pay ilang kaugalingong coliseum.”

* * *

TRIVIA.Daghang salamat ngadto ni Rudy Pelayo sa greetings nga iyang gipada kanato. Si Rudy taga Ormoc City apan lumad nga Sugbuanon ang kagikan...Salamat sad sa atong mga higalang bumabasa diha sa Basak Mambaling ug kasikbit nga mga dapit.