Gubat batok sugal

Kudos ngadto sa kapolisan sa ilang kalamposan batok sa masiao dinhi sa dakbayan sa Sugbo. Nagpasabot kini nga gipakusgan na gayud ang kampanya sa otoridad batok sa ilegal nga sugal.

Sulod lamang sa usa ka semana, duha ka giingong personalidad nga nalambigit sa masiao ang nadakpan sa kapolisan sa sunod-sunod nga operasyon didto sa duha ka barangay niining dakbayan.

Unang nadakpan ang giingong financier sa masiao didto sa Barangay Pasil. Matud sa otoridad, notado kuno kining maong financier gumikan kay moabot pa sa probinsiya sa Sugbo ang iyang operasyon.

Ug sa niaging mga adlaw, usa ka anak sa kapitan sa usa ka barangay ang nasignit usab sa kapolisan tungod sa iyang kalambigitan sa masiao. Matud pa sa kapolisan nga si Niño Resurreccion usa ka notadong general coordinator sa Barangay Busay, kansang kapitan mao ang iyang amahan.

Kining maong mga pagpangronda sa kapolisan nagpamatuod lamang nga gitinuod na gayud sa otoridad ang paggukod sa mga nalambigit niining matang sa ilegal nga kalihokan. Signal na kini sa gipakusgang kampanya.

Ug magsilbi usab kining warning ngadto sa mga nagpaluyo niining mga ilegal nga sugal. Nga ila nang hunongon ang maong negosyo aron dili sila gukdon sa otoridad.

Sukad pa sa una hangtud karon, grabe gayud ang operasyon sa ilegal nga sugal ning dakbayan. Gani halos tanang barangay na ang naapektohan na niini.

Ang hinungdan ngano nga wala gayud milurang ang masiao ug uban pang klase sa ilegal nga sugal mao ang kahuyang sa kampanya sa otoridad batok niini. Hangtud karon, misutoy gayud kining mga gidiling sugal.

Wala na siguroy barangay dinhi sa dakbayan sa Sugbo ang wala matakdi niining sakit sa ilegal nga sugal. Kini ilabina sa mga lugar diin naghitak ang kapobrehon.

Karon nga gipakusgan na ang kampanya sa masiao ug uban pang ilegal nga sugal, manghinaut kita nga tinud-on gayud sa otoridad ang pagsilhig niadtong mga nalambigit niini.

Ug dili lamang mga ginagmay nga runner sa sugal ang gukdon sa otoridad. Kinahanglan unahon sa kapolisan ang mga financier ug uban pang dagkong tawo nga nagpaluyo niini.

Kini aron nga malukat gayud ang gamot niining maong cancer sa katilingban.