Ang DAP ug PDAF

Ang Development Acceleration Program  (DAP) fund ug Priority Development Assistance Fund mga kontrobersiyal nga pundo sa gobiyerno. Kini tungod kay wala taronga ang paggamit niini, matud pa sa mga nagreklamo.

Apan sa dili pa ta moadto sa unahan ato usang ila-ilahon kining duha ka kontrobersiyal nga pundo. Unsa bay  kalainan niining duha. Para asa ba kining maong pundo.

Ang Priority Development Assistance Fund ilado na kaayo ni nato tungod kay mao man ni ang nagdasig sa mga politiko nga magkongresista ug magsenador . Ang nahisgotang pundo gigahin para sa matag usa ka magbabalaud alang sa ilang mga paborito nga hataganan niini. Daghan na ang nakapahimulos niini pero ang nakapahimulos gyod og maayo niini mao ra usab ang mga magbabalaud tungod kay ang pinakadako nga bulto sa pundo ila ra man usab nga gibulsa.

Karon, legal ba ang Priority Development Assistance Fund? Kun ikaw ang pasultihon ang nahisgotang pundo dili lang illegal, immoral pa gyod tungod kay pag-usik-usik ug para kurakot lang kini. Pero kun ang   Korte Suprema ang pasultihon, ang Priority Development Assistance Fund legal. Kini sigun sa iyang hukom sa kasong Philippine Constitutional Association vs. Enriquez.  Gani sa maong hukom gidayeg pa sa Korte Suprema ang kongreso sa ilang paggahin sa pundo nga gitawag og PDAF.

Samtang ang Development Acceleration Program fund bag-o lang ni natong nahibawan. Karon lang ni motunga. Ang maong pundo giingon nga pundo sa gobyerno nga wala magamit maong gigamit sa gobyerno ni Pangulong Noynoy Aquino.

Mao seguro kini ang hinungdan kun nganong gigamit kini sa pagpamalit sa boto sa mga Senador aron konbiktuhon si chief justice Renato Corona sa iyang impeachment trial. Tag  P50 milyones ra ugod kada Senador gawas ni Enrile, Drilon ug Escudero kay tag P100 milyon lang sila. Kun legal ba kini, gidibatihan pa kini sa Korte Suprema. Ang Korte Suprema mi-sked pa sa debate karong Oktubre 22.

Kun kamo ang pangutan-on, legal ba ang Development Acceleration Program fund? Seguro pariha ta og tubag. Pero kun pariha ba ta og tubag sa Korte Suprema, mao ni ang atong paaboton. Abangan.