Ospital alang sa mga OFW

Aduna nay Medical Care Program ang gobiyerno alang sa Overseas Filipino Workers (OFW) nga maoy moatiman sa panglawas sa mga Pilipino nga nagtrabaho sa laing mga nasod. Apan alang kang Senador Lito Lapid dili pa kini igo aron maatiman gayod ang kahimsog sa mga OFW.

Gitinguha ni Lapid nga matukoran og kaugalingong ospital ang mga OFW ug ingon man ang ilang mga pamilya nga nagsalig kanila. Gipanday na karon sa senador ang Senate Bill 1080 nga mao ang “OFW Hospital Act of 2013”, nga mao unya nay makahatag og dakong kaayohan sa kahimsog sa kaigsuonan natong mga Pilipino nga nagtrabaho sa ubang kanasoran.

Tuyo ni Lapid nga mahatagan og dakong pagtagad sa gobiyerno ang panglawas sa mga OFW pinaagi sa pagtukod og kaugalingong ospital nga alang kanila ug sa ilang pamilya.

Kun sabton gayod, husto si Lapid. Maayo ang iyang panglantaw sa kahimsog sa panglawas sa mga OFW. Nasayod siya nga dako’g gikatabang ang mga OFW alang sa pag-usbaw sa ekonomiya sa nasud nga Pilipinhon. Dili malalis nga ang mga OFW maoy hut-ong sa mga Pilipino nga nakapasulod og mga dolyares sa kaban sa gobiyerno.

Base gud sa statistic, 42 porsiyento sa mga OFW nga nahibalik sa Pilipinas nagkinahanglan sa pag-atimang medikal tungod sa lain-laing balatian nga mitakboy kanila. Ug ang Medical Care Program limitado man ang medikal nga serbisyo alang sa mga OFW.

Kun hingpit nga mahimong balaud ang Senate Bill 1080, makasiguro na ang mga OFW nga aduna sila’y kaugalingong ospital nga pagatukoron sa gobiyerno. Dili lamang angay kanila kun dili alang usab sa ilang mga dependent.

Angayan lang tuod nga hatagan og hustong proteksiyon ang mga OFW alang sa ilang medikal nga panginahanglan kay dako kaayo sila’g nahimo sa pagtabang sa pag-uswag sa atong nasud pinaagi sa gipasulod nilang mga dolyares nga karon napahimuslan sa atong gobiyerno alang sa mga proyekto ug programa nga giugmad para sa kaayohan sa nasud. -- Mylene Jesusa, Sogod, Cebu