PLDT, Osmeña Boulevard, dili safe

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Samtang nag-order ko’g pamahaw sa akong suking gamay’ng kan-anan diha duol sa Cebu City Police Office (CCPO), Bank of Philippine Island (BPI) ug Philippine Long Distance Telephone (PLDT) nga anaa mahimutang sa Osmeña Boulevard (formerly Jones Avenue) ning dakbayan, misanting akong mga dalunggan nga nakadungog sa tag-iya, kinsa mao mismoy mitakos sa akong pagkaon, nga nagyawyaw.

“Haskang grabeha, Sir. Ang akong gisugo sa pagpasensilyo’g tibuok P500 diha sa tindahan tupad sa PLDT, na’ayy...nagsige pag barog, daw natulala. Wa pa mobalik nganhi.”

“Kay ngano man diay, Day?” Dali kong sukna.

“Unsaon, ang tibuok P500 nga iya na untang pasensilyohan, gikalit man lang sa paglabnot niadtong bulingit nga bata, uy!” Seryosong tug-an sa tindera nga nakahukad na sa akong gi-order. Unya, mipadayon: “nakamay-ong nuon ko adtong bataa. Kay dihay usa ka higayon nga samtang may ka-estorya ang opisyal sa kapolisan, kulit kaayo ning nangayo’g kuwarta kay nagkutoy na kuno iyang tiyan sa kagutom. Gisamokan ang opisyal, gihataga’g P20 ang karaho! Pero karon, ang maong bulingit nga bata, nanglabnot na gyud.” May kasubo nga mihulma sa nawong sa tinderang tag-iya. Dako na kaayo ang naasoy’ng kantidad nga nawala para kaniya.

Among silingan, diha sab tulisa sa parkingan sa PLDT. Human siya mobayad sa ilang electric bill pinaagi sa customer service machine, gisugat sab siya’g hait nga kutsilyo sa hold-aper ug gidul-it ang tumoy niini sa iyang kilid dungan ang pagdeklarar: “Kana rang bag nimo ang gusto ko, Ma’am.”

Nadala gyud sa tulisan ang ubay-ubay’ng salapi ug mga valuables nga maoy sulod sa iyang bag. Haskang paspasa nga nawala sa iyang panan-aw ang kanahan. Kini nagpaila lang nga bisan ang PLDT silingan ra’g buhatan sa CCPO, di lang diay gihapon safe ang ilang mga kustomer. Paita, sa? --