EDITORYAL - Ang mga pangandoy nga taphaw

Daghan  kaayong  moingon  nga himoon  nato ang  atong  lugar sama  sa Hongkong, ug Singapore  tungod  kay  nagtuo  man  ang  tanan  nga daghan  gyud  og  kuwarta  ang  Pilipinas.

Kun  nakab-ot  man  sa maong mga  goberno   sa gawas  ang  nindot  nilang  mga  kahimtang, kay wa ka  nay  makita  nga  mga  eskuwater, nindot  usab  unta  kun  makat-onan  kini  sa  mga  Filipino.

Ang  barangay maoy  sumbanan  sa kalimpyo  ug kahugaw  sa usa  ka siyudad,  busa  naa  magsukad  ang  maayong  mga  plano  sa magdumala  sa  barangay.

Kun  ang  kapitan, igo  lang  molingkod sa  pagka-kapitan,  mohusay  og  kaso  sa barangay, mopirma og  mga  pirmahanan, mosuperbisar  sa  mga  proyekto  s a  city hall, inighuman  matulog, aw hangtud  nga  mawagtang  siya  sa iyang  puwesto wa gyuy kauswagan  ang iyang  barangay.

Di man  tingale  ingon  niini  ang  mga  opisyal  sa barangay  didto  sa Singapore ug  uban  pang  mga  nasud  nga  matawag  nga “totally  developed”, kay  kun  may  plano  nga housing unit para sa mga eskuwater  sa barangay  ang  usa  ka kapitan  ug  iya  kining  ipahibawo  ngadto sa Malacañang, makaplano  baya  tingale  unta  ang  kagamhanan  sa nasud bahin  niini.

Apan  daghan  ang  kuwarta  sa Pilipinas  unya  wa nay  kagastohan  kay  wa may  mga  plano  nga giduso  ang taga  barangay,  maoy  hinungdan  nga  gilunod  na lang sa mga  magbabalaod  ang  ilang  pork  ngadto  sa mini  nga NGO ug  naimpas  ang  P20 bilyones kapin. Kadako na  baya  kaha  unta  sa nahimo  sa maong  kuwarta.