EDITORYAL - Wa nay Botika sa Barangay

Nindot unta kun  aduna pay Botika sa Barangay kansang  mga  baligyang tambal barato ra   nga  alang sa mga  kabus.

Gitukod  ang maong  botika   sa milabay’ng administrasyon kansang  puhonan  sa  mga  tambal, iya  sa gobiyerno  ug gipiyal ang  maong  mga  tambal  ngadto  sa mga  kapitan sa barangay.

Gani may  mga espasyo sa ilang  barangay  hall  nga  maoy  gihimong  botika  ug  gipabantayan  usab  og  mga  kawani  sa barangay.

Apan sumala  pa  sa taga  Department of Health nga  giwagtang  sa kagamhanan  ang  maong  tindahan kay giabusohan  sa mga kapitan sa barangay.

Wa na sila mohisgut  og ngalan  apan  usa  sa   mga modus  sa maong  mga  opisyal, mao  nga igo  lang  gipamaligya  ang  tambal  nga  balor  og  P25 mil, nga  iya  sa gobiyerno, pagkahurot, wa  na  mangompra  og  tambal,  sa laktud  naimpas  ug  nabangkarota.

Namingaw  ang  maong  botika ug daghan  ang wa magpakabana  nga  mga  molupyo sa pagtuo  nga susama  ra  ang  presyo  sa  mga tambal  niini  didto  sa gawas.

Ang taga DOH  nga  maoy  naghatag  sa maong  mga  tambal, mitakda  og  presyo nga menus kay sa pribadong  mga  botika.

Apan  gisiguro  nila  nga  may ikasuhol  ang  barangay sa gipabantay  niini  ug  may  ginansya  usab  ang  barangay  sa presyo  nga  gitakda  sa matag  usa  ka  tambal.

Tungod kay wa maayong  pagkadumala, nabangkarota.