Kinahanglan patas

Adunay gipasaka si Senador Vicente Sotto III nga usa ka proposal nga maghatag og 14th month pay ngadto sa mga  mamumuo sa nasud.

Ang iyang Senate Bill  1645 nagtinguha paghatag sa maong insentibo ngadto sa regular nga mga empleyado sa kagamhanan ug sa pribadong sektor.

Daghan tinuod ang nalipay niini, ilabina ang mga nagkadaiyang grupo sa mga mamumuo.  Hinuon kinsa bay dili nalipay niining maong bag-ong kalamboan?

Apan, sama sa gituohan sa tanan, dakong supak niini ang sektor sa mga magpapatigayon. Matud nila, usa kini ka counter-productive alang sa mga mamumuhonan sa nasud.

Gani rason sa mga magpapatigayon nga ang 14th month pay dakong palas-anon kanila niining panahon nga nagkataas ang labor cost sa Pilipinas.

Ug nahadlok sila nga basin unya kun mobahar na hinuon ang investment sa Pilipinas gikan sa langyaw'ng mga mamumuhonan. Kini gumikan usab sa dugang labor cost sa nasud ikumpara sa ubang mga nasud sa Asya.

Apan kun atong hunahunaon, angay lamang nga mahatagan og dugang benepisyo ang mga mamumuo ning panahon nga nindot ang klima sa negosyo sa nasud.

Dili nato ikalimod nga milambo pag-ayo karon ang sektor sa patigayon  tungod sa grabe'ng pag-uswag sa atong ekonomiya. Kini ang hinungdan nga pabilin ang kumpiyansa sa  mga langyaw'ng  negosyante sa Pilipinas.

Bisan pa man sa maayong dagan sa ekonomiya sa nasud, pabiling kulang sa dugang benepisyo ang mga mamumuo. Ug angay lamang usab silang tagdon sa sektor sa mga mamumuhonan aron mouswag usab ang ilang kahimtang.

Hinuon, morag mag-agi sa buho sa dagom ang gipasakang balaudnon ni Sotto. Kini gumikan kay morebenta gayud ang mga negosyante niini.

Dili ikalimod nga grabe og impluwensiya ang mga magpapatigayon sa sistema sa pulitika sa nasud, hinungdan nga lisod kining maong balaudnon nga mapasar.

Apan mas labing maayo nga mahigmata ang atong mga magbabalaod sa kahimtang sa mga mamumuo ug nga mosuporta sila niining maong proposal. Angay lamang usab nga makatagamtam sila sa bunga sa pagsulbong sa ekonomiya.

Dili ba nga nagsige na og pasiatab ang kagamhanan kabahin sa pag-arangkada sa ekonomiya sa nasud? Kun tinuod kana, kinahanglan lamang nga patas ang makabenepisyo niini.