Way ngan nga botika

Sa labing unang higayon nakakita ko og viagra. Peke pa gyod. Bisan sa kadaghan na sa kontrobersiya sa tambal sa erectile dysfunction wa gyod kong kakita sa kapsula. Bisan niadtong naapiki si kanhi Cebu City mayor Alvin Garcia sa pagda og viagra gikan sa gawas sa nasud wa gyod kong kalili bisan sa anino na lang ning tambala.

Hangtod nga nakadawat mi sa alarma sa ronda sa National Bureau of Investigation sa botika sa Colon sa Dakbayan sa Sugbo. Nagpasad ang mga kahon sa giingong pekeng tambal ang among naabtan dayong udto gahapon. Daghang nagpunsisok di lang tungod sa presensiya sa mga sakop sa NBI ug sa media kun dili tungod sa panguryuso sa viagra.

* * *

Nalaktod ang pag-ila sa peke nga mga tambal tungod sa presensiya ni Loy Ocampo, General Manager sa Pfizer Philippines. Matod ni NBI-7 supervising agent Renan Oliva wa na kinahanglana ang presensiya sa mga opisyal sa Food and Drug Administration kay ang Pfizer mao man ang labing nakaila tinuod o peke ba ang tambal.

Malangay pa kun isumiter sa NBI sa proseso sa FDA ang pag-ila sa mga tambal. Kay kinahanglan pa nga ipada ang samples ngadto sa ulohang buhatan sa FDA. Nga mahimong maabtan pa og pila ka buwan una makatino nga peke ang viagra. Masaligon si Oliva nga makabarug na sa korte ang pagmatuod sa Pfizer nga peke ang nasakmit nga viagra.

* * *

Matud ni Ocampo ang pekeng viagra dinhi sa Sugbo maoy labing daghan nga ilang nasakmit. Una silang nakabantay sa ilegal nga mga baligya tungod sa ambulant vendors nga nanghagad sa mga kustomer sa kadalanan. Naabtan og buwan ang pagpaniid sa NBI sa wa pa mangayo og search warrant sa korte ug molusad sa operasyon.

Atol sa test buy, batan-on nga Chinese national ang nihatag sa tambal ug nidawat sa bayad sa ahente sa NBI. Si Rita Tubongbanua sa Golden Ling Merchandise ang narehistro sa business permit. Apan si Ali Tang, alyas "Alibaba", ang naabtan ug nadakpan sa NBI.

* * *

Mga kawani sa botika nga wa pay ngan niingon nga duha ka buwan pa silang namaligya sa Quirino Building sa Colon. Una nilang botika nahimutang sa Luym Building sa Plaridel sa Dakbayan sa Sugbo. Alas-9 sa buntag silang mangabli ug alas-8 sa gabii nga manera. Minimum ang ilang suholan ug mga benepisyo.

Gihulagway nila si Alibaba nga maayong managad ug si Rita nga kapin sa 70 anyos, Chinese national sab, ug tagsa rang mopakita sa botika. Way ideya si Rose Alcantara nga pekeng tambal ang ilang baligya ug mingaw’ng ilang halin. Ininsek ang marka sa mga karton apan di pang kaseguro ang Pfizer ug NBI diin himoa ang mga tambal.

* * *

Email: [email protected].