Panginahanglan ug katungod sa matag ginikanan

1. Katungod sa matag ginikanan nga pugngan ang iyang anak sa paggamit o pagmaneho sa ilang sakyanan.

Usa nako ka estudyante kaniadto ang pinangga kaayo sa iyang amahan mao nga gipalitan dayon siya og motorsiklo bisan pa man kun siya menor de edad pa lamang.

Natural walay lisensiya ug kay batan-on pa, agresibo kaayo kining modala sa motorsiklo. Ang resulta: Nadisgrasya maayo gani kay wala mamatay.

Usahay dunay mga ginikanan nga nalumsan pag-ayo sa gugma ngadto sa ilang mga anak nga tungod niini nawala pud hinuon sila sa ilang husto nga pangisip nga motugot sila nga padad-on sa sakyanan ang ilang anak bisan wala pay lisensiya.                       Bisan pag kapila pa moangal ang imong anak apan katungod nimo isip inahan o amahan nga imo siyang pakgangon kay ang tinud-anay nga pagmahal ang nakapunting lamang sa kaayohan sa batan-on ug dili sa pagtuman sa iyang kapritso.