Wagtangon na gyud ang SK

Sa boto nga 185 pabor ug 12 nga dili pabor, nauyonan sa mga sakop sa Ubos Balay Balauranan ang pag-uswag sa piniliay sa Sangguniang Kabataan sa tuig 2016. Ang tumong ug tuyo mao ang pagkonsiderar sa sugyot nga wagtangon na gayod sa hingpit ang sistema sa SK.

Sigun sa balita ning kataposang semana na sa Septembre mapalabang sa kongreso ang balaudnon nga magwagtang sa Sangguniang Kabataan o SK human unya kini mapirmahan sa Presidente.

Kung mahanay na unya sa bicamiral committee sa kongreso ang mga nagsumpaki nga balaudnon sa Senado ug Ubos Balay Balauranan mahitungod sa pagwagtang sa SK mao na gyod unya kini ang kataposan sa nahisgotang sistema.

Sigun sa version sa Senado ang piniliay sa SK iuswag ngadto sa 2016 ug ang kasamtangang mga opisyal ipabilin hangtod nga mapili sa 2016 ang mga bag-ong opisyal. Apan sa version sa Ubos Balay Balauranan walay magpabilin nga mga SK opisyal.

Ang pagwagtang sa SK nakabasi ning pito ka mga hinungdan. Una, ang sistema sa SK naglantad lamang sa mga sakop niini sa politikanhong kalihokan nga maoy nagpasulabi ang patronage nga politika.

Ikaduha, dili klaro ang iyang sumbanan ug programa. Ikatulo, walay legal nga kapasidad ang iyang mga opisyal sa sulod ug kontrata tungod kay mga minor de edad pa kini. Ikaupat, huyang ang  mekanismo sa pagkontrol sa paggamit sa iyang pundo. Ikalima, huyang usab ang tulubagon sa mga midumala sa pundo ug ingon man sa iyang performance. Ikaunom, walay tambong-tambong sa session ang mga SK opisyal tungod kay nagtungha pa kini. Unya ang ikapito, walay audit sa pundo sa SK Federation.

Ang nangamahan sa balaudnon nga magwagtang sa sistema sa SK miingon nga ang nahisgotang balaudnon gituyo aron malikay ang mga batan-on nga nagpangidaron og 16-17 anyos sa pagsulod sa tunghaan sa korapsyon.

Dako kong uyon sa iyang giingon ug labi na nga dako kong uyon nga wagtangon na lang gyod ang sistema sa SK tungod kay wala makab-ot ang tinuoray niining tumong nga mao ang pag-umol ug pagbansay sa mga batan-on nga mamahimong maayong pangulo sa nasud tungod kay karon pa lang ang pagpangurakot ug ang pagka trapo o traditional politician ang ilang nakat-onan. Kun pasagdan sila nga makapadayon ma walay ugma kining nasura.