Mas dakong eskandalo

Makapakugang ang pasidaan sa Commission on Audit. Kun nakugang na ta sa pagkabisto sa P10-bilyones nga eskandalo sa pork barrel nga naglambigit nilang Janet Lim-Napoles ug sa giingong kakunsabo nga mga senador ug mga kongresista ug peke nga non-government organizations, angay tang mangandam sa mas eksplosibo nilang findings sa ilang pagsubay sa mga transaksiyon nga gigastohan sa Malampaya Fund.

P23 bilyones sa Malampaya Fund ang naggasto sa pamunoan ni kanhi presidente Gloria Arroyo niadtong 2009, usa ka tuig sa wa pa siya mokanaog sa Malakanyang. Nasubay nang P900 milyones nga natugpa sa NGOs ni Napoles. Giunsa man kaha paggasto ang balanse nga kapin sa P22 bilyones nga pundo?

* * *

Nangagpas ang mga imbestigador sa Department of Justice, National Bureau of Investigation, buhatan sa Ombudsman ug sa COA nga ang P900 milyones nga giingong nakuha ni Napoles gikan sa Malampaya maoy nakahatag niya og bentaha pagsipong sa mas dako pang pundo gikan sa pork barrel sa mga senador ug mga kongresista.

Kay samtang ang ubang nagpaila nga "fund managers" makahatag lang sa mga senador ug mga kongresista sa ilang bahin kun mapagawas nang kuwarta gikan sa Department of Budget and Management si Napoles, salamat sa dako uyamot niyang puntil, makahatag na nilang daan og cash nga baleg 50 percent sa kinatibuk-an nilang bahin sa pinirmahay pa lang sa memorandum of agreement.

* * *

Pasiunang kasayuran nagbutyag sa mosunod nga mga buhatan nga nakakuha og dagkong bahin gikan sa Malampaya Fund human usba ni Arroyo ang lagda nga mga proyekto lang nga nahilambigit sa enerhiya ang magastohan sa dakong kita sa pagsuyop og natural gas gikan sa Palawan sukad sa 2001:

-Department of Public Works and Highways ang nakakuha sa labing dakong bahin nga P7 bilyones;

-Gisundan sa Department of Agriculture nga may P5.8 bilyones;

-Ikatulo ang lokal nga kagamhanan sa Palawan nga gibahinan og P3.9 bilyones;

-Dayon ang Department of Interior and Local Government nga nakakuha og P2.1 bilyones;

-Ang National Housing Authority may P1.4 bilyones; ug

-Ang Department of National Defense nakabahin og P1.2 bilyones.

* * *

Mas gamay ang bahin sa Department of Energy nga maoy gipahinungdan sa pundo, sa Department of Health, Department of Transportation and Communications ug Department of Agrarian Reform nga giingong gikuhaan ni Napoles sa P900 milyones.

Gipaabot nga mokita ang gobyerno og P43 bilyones sa gitakda nga 20 ka tuig nga operasyon sa Malampaya. Wa pay timaan nga gipadayon ni Presidente Noynoy Aquino ang pagwaldas sa pundo nga nasugdan ni Arroyo. Apan atong atangan ipabilin ba niyang hingpit nga pagkontrolar sa pundo o ipaagi na sa mas makiangayong sistema sa paggasto.

* * *

Email: [email protected]