Mga kontak sa selpon

Kun ang gidaghanon sa tawo sa Filipinas mokabat nag hapit 100 ka milyon, mas labaw pa kadaghan sa populasyon nato ang selpon nga gigamit sa atong nasod. Nga gibanabana anaa sa kapin kun kulang 130 ka milyon, base sa mga report. Mora’g may pagkatinuod kay may makit-an man tang tawo nga dunay 2-3 ka selpon, nga lain-lain og simpak. Bisag makililimos o basurero anaay selpon.

Unya kun nakamatikod mo, kadtong mga ordinaryong tawo, maoy sagad nga nanubra ang selpon nga gihimo na lang kalingawan sa ilang mga anak ug mga haytek pa gyud.  Ang mga estudyante, haskang  dili usab palupig ,isig pasiatab sa kinabag-ohang teknolohiya. Apan ang mga sapian o negosyante, nagmantenil la’g ordinaryong selpon, tingali tungod kay di hasol, ug dali ra kaayong gamiton.

Sa laktod nga pagkasulti, ang selpon maoy unang prayoridad sa atong istilo sa kinabuhi nga molabaw pa sa pagkaon basta lang makapalit og lod aron ika-txt o call. Mao nga kita gihapon karon ang giila nga text capital sa tibuok kalibutan. Mao nga permi adunay mga bag-ong modelo o mga klase sa selpon nga gipangdisple diha sa mga tindahan, aron i-ingganyo nga mopalit na pud og lain.

Ug unya kadtong maibog nga dili gyud tawon makapalit, mangita gyu’g paagi basta lang makaangkon anang mahalong selpon nga gikursonadahan. Busa nauso na pud halos kada adlaw may mga kaso sa kinawatay o linabnihay sa mga selpon. Mahigam kay makakuwarta man sila sa suking handusanan. Ang uban ani naa na sa prendahanan o sa mga ladlad diha sa daplin sa dalan o sa aseras.

Tungod ini, angay magmatngon sa paggamit sa selpon ilabi na diha sa mga de-pasaheroan o sa dapit nga daghang tawo, basin may matental. Kun ugaling pangayoon ang selpon mo, ihatag lang kay sa kinabuhi ang kuhaon. Aron ikaw maleksyon, unsaon kompyansa man kita magpaibog sa nindot tang selpon. Di lang kay kuhaon ang selpon mo, ang sindikato may lain pang grabeng buhaton.

Aron di mabiktima, likaye nga sa imong pagponbok, ayaw ibutang ang ngan nga ilang masabtan nga may relasyon ka ni bisan kinsa sama pananglitan anang… daddy, mom, sis, brod ug uban pa. Kay dinhi magsugod ang drama sa paghilak. Kun may mo-txt nimo nga wa ka kaila unya mora’g personal o kaha emergency, sukita una sa pagpangayo’g personal nga kasayuran, sama sa gihimo sa banko, aron mabanabana nimo nga kini dili modus sa pangilad.