Ang garbo sa barangay Quiot

Sa mga dagkong balita nga nagbansiwag sa mga pamantalaan, radyo ug telebisyon nga naghisgot sa binilyon nga anomaliya ug pagpangawkaw nga gikalambigitan sa mga kongresista ug mga senador, mikawat sa pagtagad sa mga tigsunod sa balita ang gihimo sa usa ka polis nga taga Barangay Quiot dakbayan sa Sugbo.

Ang maong polis mikawat sa pagtagad sa mga tigsunod sa balita ug mga nagpakabana tungod sa maayo niyang nabuhat.

Si Senior Police Officer 2 Isagani Ceniza, jail guard sa Cebu City Police Office miuli sa mga dolyar, alahas ug peso nga salapi nga mikabat og usa ka gatos ka libo ka pesos tanan ngadto kang Mrs. Erlinda Fleming usa ka pinay nga nakabasi na sa Amerika.

Si Mrs. Fleming miadto sa buhatan sa Cebu City Police Office sa may Gorordo Avenue aron sa pagkuha sa iyang bag nga nakit-an ni SPO2  Isagani Ceniza sa taxi nga ilang gisakyan kuyog sa iyang asawa kaniadtong miaging Biyernes.

Ang bag nga may sulod nga dolyar, peso, alahas ug identification nabiyaan ni Mrs Fleming sulod sa taxi nga iyang gisakyan samtang pauli na siya sa Barangay Kalunasan niadtong Biyernes. Ang taxi nga nasakyan ni Mrs. Fleming mao usab ang nasakyan ni SPO2 Ceniza ug sa iyang asawa. Ang salapi nga sulod sa bag mahinungdanon kaayo sa tag-iya tungod kay para kini sa chemotherapy sa iyang anak nga stage four na sa  sakit nga cancer.

Ang gihimo ni SPO2  Isagani Ceniza angayang panaminan sa ubang mga sakop sa kapolisan. Ang sama kaniya angayang padaghanon ug pasanayon tungod ang susama kanila ang gikinahanglan sa atong katilingban.

Sa mga wala masayod, si SPO2  Isagani Ceniza taga Barangay Quiot busa isip iyang silingan nga Quiotanon dako kaayo nakong garbo ang iyang gihimo. Ako manghinaut nga ang ubang mga polis nga Quiotanon mosunod unta sa maayong binuhatan ni SPO2 Ceniza. Maglaum usab ako nga ang tanang mga polis mohimo og mga maayong buhat ina kay magpabadlong. Idugang ko usab ang pagpanghinaut nga hatagan og pasidungog sa among lokal nga kagamhanan sa Barangay Quiot ug sa liderato sa kapolisan ang maayong binuhatan ni SPO2  Isagani Ceniza.  

Isip usa ka yanong molupyo, tugoti nga ang akong ipaabot diha kanimo sir SPO2 Isagani Ceniza sir ang akong pagsaludo kanimo.