Mga abusado!

Nakapaminaw ko sa pamahayag ni Benhur Luy -- ang mitistigos batok ni Janet Lim-Napoles -- nga pwerte g’yud kunong daghana sa kwarta ni Napoles nga wala na gani masulod sa iyang vault.

Kana wala pa’y labot sa kwarta nga iyang gipangdeposito sa mga bangko. Apan ang grabe g’yud sa pamahayag ni Luy mao nga ang mga magbabalaud kuno kang kansang pork barrel nabinuangan ni Napoles, nakabahin kuno’g katunga sa kantidad.

Maayo unta og mabulgar dayon ang ngalan niining maong mga senador ug kongresista unya mapasakaan dayon sila og kaso sa hukmanan.

Ang mga magbabalaud maoy miduso ngadto sa Department of Budget and Management (DBM) sa ngalan sa mga Non-Government Organizations (NGO) nga kunohay maoy mo-undertake sa ilang projects.

Apan ila ra’ng buhat-buhatan og mga resibo aron mogawas nga ang minilyon ka pesos nga kantidad sa ilang pork barrel makita nga nagasto kini sa mga proyekto, apan diay gibulsa ra.

Ang mga bogus nga NGO mohatag og katunga sa kinatibuk-ang kantidad ngadto sa magbabalaud. Mao diay nga si Napoles pwerteng daghana og kwarta.

Nganong ang maong mga magbabalaud mao man g’yud ang nangita og NGO nga mo-undertake sa ilang proyekto? Klaro na kaayo uy. Maayong bitayon kining maong mga magbabalaud.

Mao nga dili gayud moasenso pag-ayo ang atong nasud tungod sa daghang mga corrupt nga opisyal sa kagamhanan.

* * *

Husto ang lakang sa CITOM nga gukdon gayud ang mga drayber nga ilang nadakpan pinaagi lang sa Traffic Citation Tickets (TCT) aron imatuod kanila nga dili basta-basta kun sila madakpan.

Daghan man gud nga mga drayber nga ibaliwala ra ang TCT kay nagtoo nga walay bili ang pagdakop kanila sanglit dili man sakmiton ang ilang lisensya. Mao man gani nga dihang aktibo pa kaayo ko nga nanakop isip LTO deputized agent, ang mga drayber mohangyo nga Citation lang ang ipagamit.

Apan ako sila nga gipasabot nga ang LTO dili deputized sa CITOM, bali ang nahitabo kay ang ubang mga traffic enforcers sa CITOM maoy nagpa-deputize  sa LTO. Sa ato pa, wala kami mga Citation Tickets.

Nangutana ko sa daghang mga drayber kun nganong gusto sila nga Citation Tickets ra ang iisyu? Ang ilang tubag nga mahimo ra man gud nga dili lang tagdon ang Citation kay naa ra man gihapon ang ilang lisensya.

Apan kay gipasakaan na man g’yud og kaso sa CITOM katong wala mobayad sa ilang multahanan, dunay 32 ka drayber nga nalutsan na og bench warrant.

Unsay buot ipasabot sa Bench Warrant? Dakpon ang mga drayber  ug diha-diha sila nga dad-on sa hukmanan ug basahan sa ilang kaso. Sayonan ka usa ka drayber nadakpan kapin sa 300 ka higayon!!!!!