EDITORIAL - Ang pagsaka sa presyo sa bugas

Sukad masukad karon pa nakaabot og tag P50 ang kilo sa bugas nga labing nakapasamot sa kahiubos sa buot  sa  mga  Filipino  ilabi  na  sa  mga  kabus. Daghang  mga  pangutana kun unsay  mahimo sa goberno  niini, tungod  kay  matag  adjustment  ug  pagsaka  sa presyo sa pagkaon  nga  labing gikinahanglan  sa kinabuhi  sa matag  usa  ka tawo, kuli na man  kaayo  mobalik  sa ubos.

Nganong  ingon  man  niini  ang nahitabo  sa nasud  nga  unta wa  man  magkuwang ang kagamhanan  sa paghatag og  ayuda  sa  mga  mag-uuma  aron  molambo  ang  ani  sa bugas  humay  ug  mais  niini.

Kun  tinuod  nga mas  gipalabi  sa kagamhanan ang  pagbaligya  sa maong produkto  ngadto  sa gawas  sa nasud ug  pasagdan  ang  mga  negosyante  dinhi  nga  mopasaka  pag-ayo  sa presyo  sa maong  baligya di ba  kaha  kini  usa  ka surambaw? Gusto  ba  sa kagamhanan  nga  masuko  ang katawhan,  kinsa  daan  na  nga  naglagot  gumikan  sa P10 billion  pork barrel fund scam,  nga  giunay  ra  pag-abuso  sa  mga tawo  nga  anaa  ra  sa goberno?

Sa miaging  mga  tuig  mireklamo ang  mga  tawo  dihang  misaka  ang  presyo  sa bugas  og  tag kapin sa P20  matag  kilo.

Hangtud  nga gianad  og  dyutay  ang  hunahuna  sa katawhan,  misaka  kini  ngadto  sa P30 kapin matag  kilo  apan  gikan  sa maong  presyo,  kalit  lang  nga  miburot  kini  ngadto  sa pagka-P50  ang  kilo  karon.

Giingon  nga  mokalma  kining  presyoha  sa sunod  buwan  kay  ting-ani  na  sa humay, ug  ang  mga  mag-uuma  mobaligya  na  og  barato  sa  ilang  mga  produkto.

Apan  unsaon  nila  pagbaligya  sa  ubos  nga  presyo  kun  ang  ilang  mga  gasto sa "labor" kon  panuhol  sa  mga  trabahante  ug  sa  mga  panginahanglan  sa panguma  taas  na  nga  daan  ang  ilang  gasto?