Mas dakong hagit

Luyo sa kasaba sa isyu sa korapsyon, pork barrel scam ug karon ang kagubot sa Zamboanga City, laing hagit ang angayan nga hatagan og panahon sa mga Sugbuanon ug sa mga Pilipino.  Ang maong kalihukan pa ang mamahimong ugat sa garbo unya kun magmalampuson.  Ang Sugbo ang napiling dapit alang sa ika-51 nga International Eucharistic Congress kung diin gipanlantaw ang pagdagsa sa 15 mil ka mga delegado sa tibuok kalibutan.   Ang maong kalihukan ang maisip nga tinuod nga international nga tigum.  Mas daghang nasud ang mosalmot itandi sa ASEAN summit ug APEC summit kung diin ang mga sakop nga nasud ug observing countries lang ang gitahasan nga moapil.   Sa tigum karong Enero tuig 2016, gipanlantaw ang pagtambong ni Pope Francis, ang lider sa kapin bilyon ka sakop sa katolikong simbahan.

 Ang International Eucharistic Congress mahitabo ika-usa sa matag upat ka tuig.  Ang katapusang tigum nahitabo sa miaging tuig didto sa Dublin sa nasud nga Ireland.  Tumong sa kalihukan nga mas mahibaw-an ug matuhop sa kasing-kasing sa matag katoliko ang kamahinungdanon sa Eukaristiya isip sentro sa pagtuo.  Lakip sa kalihukan ang International Theological Symposium, upat ka adlaw sa di’ pa ang tigum.   Buksan ang kalihukan sa misa ug daghang mga symposia nga salmotan sa libuan ka mga delegado.  Aduna say mga cultural shows, exhibits ug pagduaw sa mga nagkadaiyang komunidad sa pagtuo. 

Nia sa nasud ang kadagkuan sa maong tigum gikan pa sa Vatican.  Tumong sa grupo ni Most Reverend Pierro Marini nga masusi asa himuon ang mga convention.  Adunay mga hiniusa ug binuwag nga tigum nga salmotan sa libuan ka mga delegado.  Di’ sama sa sagad nga tigum nga taas na ang lima ka adlaw, ang International Eucharistic Congress moabot og napu’ ka adlaw.  Ang tanan tigum, dinhi sa Sugbo pagahimuon.  Ang labing dakong garbo nga mahimo ning tanan sa mga Sugbuanon likod sa daghang isyu nga gisagubang sa nasud gikan sa seguridad hangtud na sa moralidad.

Apan daghang angay nga tan-awon ang simbahan sa di’ pa ang tigum sa Enero tuig 2016 kung diin maggikan ang mga delegado sa halos tanang nasud sa kalibutan diin buhi ang presensya sa pagtuong katoliko.   Haum ang gipili sa niretiro nga santo papa, Pope Emeritus Benedict XVI nga dinhi sa Sugbo ipahigayon ang maong tigum likod sa mga hagit nga gisagubang sa nasud karon.  Ang garbo sa pagsulbong sa ekonomiya apan wa’ pa matagamtami sa daghang mga Pilipino nga nag-antos sa kalisud ug kawad-on sa trabaho, mahimong mabulgar sa tanan atol sa maong mga adlaw.  Di’ lang kapakyas sa pagtunol sa nag-unang panginahanglan ang mabutang sa publiko ug mahibaw-an sa tanan, apan lakip na ang mga isyu sa moralidad.

Hagit sa moralidad ang grabeng pagpangawat sa mga lider sa nasud pinaagi sa ilang PDAF kon pork barrel.  Ang maong tigum maoy mosukod sa kalig-on sa moralidad sa nasud nga ilang giduaw alang sa maong tigum.  Sa maong tigum ‘sab mahibaw-an unsay mga kaguliyang nga nahitabo dinhi isip pagsukod sa katakos sa gobyerno pagtubag sa mga nag-unang panginahanglan sa iyang mga tawo.   Tinuod nga ang Pilipinas ang nahimong duyan sa bag-ong sibilisasyon sa pagtuong Katoliko, apan nahimo ‘sab ning duyan sa pagpangawat, pagpangabuso sa katungod ug pagkalimot sa mga responsable nga manubag sa mga kasaypanan nga ilang nahimo.

Gawas nga mabutang sa dakong kwestyon ang pamaagi sa gobyerno ug ang mismong gawi sa mga Pilipino, bisan siguro ang kaparian nga adunay di’ maayong nahimo sa ilang parokya ug mga parokyano, mabutang ‘sab sa publiko atol sa maong mga adlaw aron pagpahinumdum sa simbahan sa iyang mga kahuyang.  Apan ang labing dakong hagit anaa sa seguridad ug pag-atiman sa libuan ka mga delegado.   Dakong kwestyon sa pagkakaron kung asa papuy-on ang mga partisipante ug kung igo ba ang mga convention centers sa gikinahanglan sa organizing committee gikan sa Vatican. 

Kung isipon ang tuig 2016 daw daghang libaong nga subayon pa ang nasud.  Apan kung tan-awon ang mga nahitabo karon nga paningkamot sa paglimpyo sa dungog sa gobyerno, igo na unta ni nga hagit aron manglimpyo ‘sab ang simbahan sa iyang dungog uban ang matag usa sa mga layko aron hingpit nga madawat ang gasa sa usa ka kalibutanhong tigum nga gihatag ug gisalig sa mismong lider sa simbahan.

email: [email protected]. or [email protected].