Remittance

Gitakda nga himuon karong Sept. 19 ang laing halapad nga protesta batok sa pork barrel system.

Kining protestaha hayan dili makatigom og daghang raliyista sama niadtong Million People March diin mga 100,000 ang nangapil didto sa Rizal Park sa Manila. Apan kun mahinayon, daku-dako gyung kadaut ang mahimo niini sa ekonomiya sa nasud.

* * *

Sa ato nang nahibaw-an, ang nasud nga Pilipinhon misalig og dako sa remittance sa mga OFW isip tigpauswag sa  atong ekonomiya. Usa ka adlaw lamang nga dili makaremit ang mga OFWs grabe nang kadaut nga mahimo niini sa ekonomiya sa nasud.

Matud pa sa mga tigpasiugda niining umaabot mga protesta, molambigit kini sa mga OFW dili lang sa Saudi ug ubang nasud sa Middle East kun dili sa tanang OFW sa tanang dapit sa kalibutan.

* * *

Ang mga indibidwal nga Pilipinhon nga mangaigo niining Zero Remittance Day mao ang mga sakop sa pamilya kinsa nagpaabot sa kuwarta nga ipadala ngadto kanila sa ilang kabanay nga nagtrabaho sa gawas.

Matud sa usa ka asawa kang kansang bana nagtrabaho isip karpintero sa Saudi okay ra kaniya kining Zero Remittance Day kay alang man kini sa kaayuhan sa kadaghanan, apan “makapangutang gyud tag usa ka adlaw niini.”

Usa ka college coed nga nagtuon og abogasiya miingon: “Wa ko’y kwestyon niini ... maayo man ang tumong apan maninguha ta nga kadtong mga lawmakers nga maoy gamot niining pork barrel scam dili na unta mahibalik sa katungdanan.”

* * *

TRIVIA. Maayong adlaw diha sa atong mga magbabasa sa Cordova labi na kadtong naa sa munisipyo nanarbaho. Salamat sa inyong suporta sa Banat News.