Sulat para kaninyo sa Mindanao

Pinangga kong taga Mindanao.

Nagsuwat ako karon kaninyo aron magpahibalo nga walay rason nga magreklamo si Nur Misuari sa gobyerno tungod kay gihatagan na siya og higayon kaniadto, nga makadumala ug makatabang kaninyo panahon sa kagamhanan ni Pangulong Fidel V. Ramos. Kun nakabasa si Nur Misuari ning akong suwat, ako siyang pahinumdoman nga gibuhong siya sa kagamhanan ni Ramos.

Ako kamong pahibaw-on kun wala pa kamo makahibawo mga igsoon ko sa Mindanao ug pahinumduman si Mr. Nur Misuari kun nakalimot na siya nga sa dihang migakos siya sa kagamhanan ni Ramos gihimo siya niini nga Chairman sa SPCPD o Southern Philippines Council for Peace and Development diin bilyones nga salapi gikan sa kagamhanan ang gitugyan alang sa iyang SPCPD pero unsay iyang gihimo, inay kay gamiton ang salapi sa pagpataas sa inyong mga panginabuhi ug kahimtang sa katilingban sa atong katilingban, ang bilyones nga salapi iya hinuong gigamit sa paghimo og tagoanan nga konkreto ilawom sa yuta ug ang uban gilaag-laag didto sa gawas sa nasud.

Kamo nasayod nga gihimo ni Pangulong Fidel V. Ramos si Nur Misuari nga gobernador sa Autonomous Region of Muslim Mindanao ug gihatagan sa tanan niyang gusto pero unsay iyang gihimo, ang iya rang kaugalingon ang iyang gisiguro kauban sa iyang mga suod samtang kamo nga iyang giingon nga iyang gipakigbisogan gipasagdan. Mao ni ang hinungdan nganong sa pag-abot sa piniliay inyo siyang gipildi ug wala na ninyo siya paluyohi. Mao ni ang hinungdan nganong mibalik sa pagrebelde ug nakig gubat sa gobyerno si Nur Misuari.

Sa mga sakop sa Moro National Liberation Front giawhag ko kamo sa pagmata ug usisaha ang katuyoan sa inyong gituohan nga pangulo kay, kun ako ang inyong pangutan-on, tubagon ko kamo sa pag-ingon: gigamit ra mo sa inyong pangulo. Kamo ang makaluluoy kun magpadayon kamo sa pagsunod kaniya.

Ang nasudnong kagamhanan naningkamot nga matubag ang inyong mga panginahanglan pinaagi sa inyong mga pinili nga opisyal pero subo ang nahitabo tungod kay ang ila rang interest ang ilang gitan-aw. Wala na kamo pasagdi sa nasudnong kagamhanan, giatiman na kamo sa mga nanglabay natong mga pangulo sa nasud apan nahigot kamo sa managlahing personal nga interest sa inyong mga lokal nga pangulo nga inyong gitugotan nga makahigot usab kaninyo.

Tungod sa managlahing personal nga interest sa inyong mga pangulo diha sa Mindanao, nahikawan kamo sa dugay na ninyong gipangandoy nga kalinaw. Bisan unsaon pa sa pagpaningkamot sa gobyerno nga mahatagan mo og kalinaw, idlas gyod gihapon kini kun dili magkatukma ang interest sa inyong gisunod nga mga pangulo.

Kamo ra ang makasulbad sa inyong suliran. Pakigbatoki ang mga interest nga mihigot kaninyo sa kagubot ug mihikaw kaninyo sa kalinaw.

Kaninyo matinahuron ug kauban sa pagkab-ot sa kalinaw sa Mindanao.