Obligado ka bang mobayad sa utang sa credit card?

Dear atty. Divine,

Aduna lang unta koy ipangutana labot sa akong credit card. Naabtan ko og credit card pero wa man koy gipirmahan labot sa mga terms  and conditions niini ilabi na sa iyang interest ug penalty. Akong gigamit ang maong credit card ug karon gipadad-an ko og bill sa bangko miabot man og P50,000 ang akong bayranan kay apil na daw niini ang interest ug ang penalty. Ang akong pangutana Atty. kun obligado ba ko nga mobayad sa maong utang? Dili ba kinahanglan man ta nga mopirma sa mga terms and conditions aron sila makapaningil nato sa interest? Hinaut nga imong matubag ang akong pangutana. Daghang salamat.                       

— Jason

Dear Jason,

Kanunay nako nga nakadawat og email nga susama nimo og pangutana. Kun ang credit card imong gigamit natural obligado gyud ka nga mobayad niini bisan pa kun ibutang ta lang wa kay napirmahan nga kontrata o uban pang dokumento labot niini gikan sa bangko nga naghatag kanimo og credit card. Mao nay giingon nga ang utang ay dapat bayaran. Ang kana man gud utang nato sa credit card makonsiderar kana nga simple loan. Ang ubang bangko  dili sab kaayo strikto sa ilang mga requirements sa dili pa sila mohatag og credit card sa usa ka tawo. Hinuon kanang sa interest sa dili pa ta paninglan niana kinahanglan sab gyud aduna moy kasabutan in writing ug importante nga miuyon ka nianang maong kasabutan. Busa kun taas kaayo ang interest nga gipahamtang sa bangko kanimo mamahimo ka nga mo-question niini. Aduna nay mga desisyon ang Korte Suprema kalabot niana nga diin ang labaw’ng hukmanan miingon nga ang nangutang di mapugos sa pagbayad sa taas nga interest kun wa sila’y kasabutan nga pirmado gyud sa nangutang. Gani adunay higayon nga ang Korte Suprema mipakgang sab sa taas kaayo nga interest nga gipahamtang sa creditor bisan pa kun miuyon pa niini ang debtor. Sa ato pa, angayan lang nga reasonable lang ang interest nga ipahamtang sa creditor ngadto sa debtor. Hinaut nga akong natubag ang imong pangutana.

—Atty. Divine

Kun kamo adunay pangutana ipadala lang sa Legal Corner sa Banat News or email sa [email protected]. ug akong tubagon ang inyong pangutana pinaagi sa akong column matag adlaw’ng Miyerkules ug Domingo.