Kalma sa kaon

Akong mga pahasubo sa pamilya ni Darryl Carumba, akong higala ug kauban sa Banat News. Namatay si Carumba human siya giatake sa grabe nga “high blood pressure.”

Pastilan, makahinuktok ko kay mora’g nagkakita pa man gani kami ni Darryl atul sa pagbukas sa Broadkasters Month didto sa Kapitolyo niadtong Septiyembre 1. Nakahinumdom ko nga nakadaug man siya sa raffle.

Kini lagi kuno’ng high blood, kun duna ka na niini, angay ka na nga magbantay. Ako lang, dili gayud nako kalimtan nga matag buntag sa dili pa ko molakaw moinum gayud ko sa akong maintenance. Unya, limit na g’yud sa pagkaon. Itsa-pwera na ang mga litson, beer ug uban pa nga makadaut sa panglawas. Kaniadto, matag adlaw nga Sabado sadya kaayo ang imnanan nga akong kinaham.

Diha go’y usa ka higayon nga 11 ka botelya nga beer ang akong nahurot ug ang mga “standard songs” ingon man ang mga kanta nila ni Martin Nievera, Marco Sison, Anthony Castelo, Rico Puno maoy gihimo nako nga sumsoman.

Resulta, saka ang pressure ug mogawas na ang mga sakit-sakit. Karon, kun makakita ko og mga tawo nga mag-inum unya daghan kaayo ang imnon nga beer, mora ko’g magkatawa.

Bitaw, gituyo nako ang paghisgot niini aron makahatag pa ako og tambag sa uban nako nga mga amigo nga malikay sila sa dili maayo nga kahimtang.

Kun dili gayud mapugngan, usa ka botelya na lang sa beer ang imna sa usa ka semana. Likayi ang pagpanabako unya limit sa imong pagkaon, ilabi na ang “rice” usa ra ka tasa ang kan-a.

Kaniadto tambok kaayo ko apan maghingak-hingak nga maglakaw og tungason. Karon nga dili na kaayo daku ang akong tiyan ug migamay na ang akong lawas, makatungas na ko sa Marco Polo paingon sa “TOPS” nga magdagan.

Hapit na ra ba ang Press Freedom Week nga daghan kaayo og mga party ang media, tambagan nako ang akong mga kauban nga kalma lang ta sa pagkaon kay para dili ta mapareho’ng Darryl.

* * *

Angayan g’yud nga dugangan ni Cebu City Police director Noli Romana ang mga sakop sa Anti-Dispatching Team ug paspasan gayud ang pagpangsikop niining mga dispatchers.  

Giobserbahan nako ang kalihukan sa mga dispatcher nga nag-operate atubangan sa usa ka botika sa Rotunda sa Lahug (atbang sa JY Square) kaniadtong Lunes sa gabii.

Daan na nga daghang mga tawo ang nag-atang og kasakyan. Pagdanga-danga sa usa ka PUJ nagwara-wara dayon ang dispatcher ug kay dali ra man nga napuno, kang-kang dayon ang kamot nga mangayo sa drayber.

Maayo ba gud na? Kun walay dispatcher dili diay makasakay ang mga pasahero?