Buhi-a si Janet

Tulo ka pulis ang motilaw sa pagkaon ni Janet Napoles sa di’ pa ni dad-on sa iyang selda sa Sto. Domingo sa Sta. Rosa City sa Laguna.  Usa lang ni sa mga security measure nga gipahamtang sa kabalaka nga basin adunay mohilo ni Napoles aron mamatay.  Bisan ang iyang puy-anan nga lawak nga nagamit na kaniadto ni kanhi Presidente Erap Estrada sa kasong plunder, Senador Gringo Honasan sa kasong mutiny ug uban pang dagkong personalidad nga nakabuhat og kasaypanan sa gobyerno di’ basta-bastang seguridad ang gipatuman.  Gipalibutan og taas nga koral nga ginama sa barbed wire ug kabilya ang daw usa ka ‘classroom’ nga building ug gitabilan og sako aron di’ makita ang su’d nga bahin.

Buhion si Janet.  Kini karon ang maayong buhaton sa gobyerno aron motuo ang mga tawo nga matinud-anon ni sa kampanya batok sa korapsyon sa nasud.  Gawas sa taas nga koral,  adunay duha ka babaye nga guwardya nga nag-atang sa su’d nga bahin gikoral nga pasilidad.   Adlaw ug gabii ang guwardya nga mahimong motubag kun adunay panginahanglan ang labing sikat nga binilanggo sa nasud karon.  Giingong nag-antos sa sakit nga diabetes ug high blood pressure si Napoles nga matag karon ug unya, mahimong labing dakong hulga sa iyang panlawas.   Sa mga miaging gabii, niubos ug nisaka ang iyang sugar ug BP.   Apan luyo ining tanan, gipaningkamotan nga matubag ang iyang panginahanglang medikal.

Buhi-a si Janet Napoles.  Kung simbako matuman ang gikahadlokan nga hiloan siya ug simbako og mamatay siya sa iyang sakit diha su’d sa selda, wa’y gamit ang atong gihuptan nga paglaom nga masakpan na kinsa ang mga tawo nga nakabenepisyo sa pork barrel ug masilotan ang maong mga tawo.   Kung simbako di’ mabantayan ug magpakamatay na lang si Napoles tungod kay alang niya nagkagamay na ang iyang kalibutan, intawon pagka-way klaro sa mga paningkamot nga mapapas na ang giisip nga tinubdan sa kalisud ug kakabus sa mga Pilipino—ang korapsyon sa mga opisyal.

Buhi-a si Janet Napoles.  Bisan kun nagpasabot nga ibalhin siya og tambalanan o hospital arrest angayan ning ihatag ngadto niya.  Kung nagkinahanglan siya og banggiitang doktor likod sa iyang giantos nga mga sakit, mas labing maayo nga ihatag na niya.  Kung nagkinahanglan siya nga isu’d sa air-conditioned nga lawak, ihatag na ngadto niya.  Kung nagkinahanglan siya og pamilya nga iyang mahinabi sa matag karon ug unya, ihatag na ngadto niya.  Buhion si Janet Napoles.   Kini karon ang tumong sa mga tawo nga dugay nang nangita og nawong sa korapsyon ug dugay nang nangita og hustisya ining tanan.  Kung si Janet Napoles ang yabi ining tanan—utang kabubut-on di’ siya mahimong mamatay tunga-tunga ning paningkamot nga matugkad kinsay padrino ug mga nakasapi sa pork barrel.

Buhion si Janet Napoles bisan pa sa grabeng kalagot sa mga tawo ngadto niya.  Sa binilyon ka pesos nga giingong iyang nabulsa gikan sa pork barrel pinaagi sa pagtukod og bogus nga mga NGO, mahimo ra unta ni Napoles nga mokagiw sa ubang nasud ug di’ na mopauli dinhi.  Sa kalapad sa iyang impluwensya tungod sa kadaghan sa iyang koneksyon, mahimo ra unta siyang mobiya ug mopuyo na sa ubang nasud.  O sa kadispirada na sa iyang kaso ug kahimtang, mahimo ra utang kutluon ni Napoles ang iyang kinabuhi aron di’ ‘ta mahibawong tanan kinsa iyang kakunsabo sa ilegal nga pagmani-obra sa pork barrel.  Sa wa-is ni Napoles, mahimo ra unta niyang talikdan ang tanan.  Apan gipili ni Napoles nga mabuhi ug motahan ngadto sa presidente uban sa saad nga iyang ibutyag ang tanan niyang nahibaw-an kabahin sa pork barrel scam.

Intawon, buhi-a si Napoles.  Kini ang usa sa akong mga gi-ampo matag adlaw.  Di’  ni sayon nga pakigkumbati ang gihimo sa matag Pilipino karon nga su’d sa pila na ka dekada gilingla sa paggamit sa buhis ug gibiktima sa mga korakot sa gobyerno.  Kung gikinahanglan nga mabuhi ang usa ka Janet Napoles nga maoy gitudlong reyna ining tanan--- mas labing maayo kung nagpasabot ni og solusyon sa dugay nang problema.

* * *

Email: [email protected]. or [email protected].