Bug-at nga silot ipahamtang sa mga abusadong drivers sa bag-ong balaod

Halos matag adlaw aduna gyuy matala nga mga disgrasya sa kadalanan sa nagkalain-laing dapit sa Pilipinas. Usa sa gitumbok nga hinungdan niini mao kining mga abusado nga drivers nga di motuman sa mga lagda sa trapiko. Laing hinungdan sab niini mao kining pagmaneho sa mga sakyanan nga hubog o sabog sa drugas. Kini maoy hinungdan nga ang kongreso mipasar og balaod nga magpahamtang og silot sa mga tawong momaneho sa ilang sakyanan nga hubog o ubos sa influence sa drugas. Apan unsa bay mga silot nga ipahamtang kanila basi sa bag-ong balaod? Kana nga pangutana ang atong tubagon karon sa atong column.

Dear Atty. Divine,

Usa ko ka driver ug nakadungog ko nga adunay balaod nga magsilot sa mga hubog nga momaneho kun kini makaligis o makabangga. Gusto lang unta ko masayud kun unsa may silot kun ang driver nga hubog nga nagmaneho madisgrasya? Hinaut nga imo kong mahatagan og impormasyon kalabot niini. Daghang Salamat. —Rolly

Dear Rolly,

Bag-o lang gipirmahan ni Pres. Noynoy Aquino ang Republic Act No. 10586 nga gitawag og Anti-Drunk and Drugged Driving Act of 2013. Kining maong balaod magpahamtang og silot ni bisan kinsa nga magmaneho sa ilang sakyanan nga hubog o sabog sa illegal nga drugas. Tumong niini mao ang pagprotihir sa publiko gikan sa mga abusadong driver. Basi sa Section 12 sa maong balaod, adunay silot nga tulo ka buwan nga pagkabilanggo og multa nga 20 mil pesos ngadto sa 80 mil pesos ang si bisan kinsa nga hubog o sabog sa drugas nga nagmaneho sa iyang sakyanan. Apan kun atul sa iyang pagkabangga adunay naangol, ang silot niini ibasi sa Article 263 sa Revised Penal Code o ba kaha kining maong balaod depende kun unsay mas bug-at kanila nga silot ug ang multa niini moabot sa 100 mil pesos ngadto sa 200 mil pesos. Apan kun aduna gyuy namatay sa maong pagkadisgrasya, ang silot niini ibasi sa Article 249 sa Revised Penal Code ug ang multa niini maggikan sa 300 mil pesos ngadto na sa tunga sa milyon ka pesos. Gawas pa niini, ang driver nga makombikto sa maong salaod masuspenso ang lisensya sud sa usa ka tuig kun kini nagkupot og nonprofessional driver’s license apan kun ang maong driver nagkupot og professional driver’s license hayan irevoked sa LTO ang iyang lisensya ug di na gyud siya makamaneho. Hinaut nga akong natubag ang imong pangutana. Daghang Salamat ug drive safely. — Atty. Divine

Alang sa inyong mga pangutana, ipadala lang sa Legal Corner sa Banat News sa V. Gullas Street, Cebu City or email sa [email protected]. ug akong tubagon ang inyong pangutana matag adlaw’ng Miyerkules ug Domingo.