Ang puy-anan ni Janet

Gibalhin na og bag-ong pasilidad si Janet Lim Napoles.  Gikan sa Camp Crame sa unang gabii sa iyang pagtahan, ngadto sa Makati City jail, karon gibalhog si Napoles sa usa ka dapit nga di’ na bag-o sa publiko—ang Fort Santo Domingo sa Santa Rosa City sa lalawigan sa Laguna.  Sa maong pasilidad ‘sab gibalhog kaniadto silang kanhi Presidente Joseph Estrada human masiluti sa kasong plunder, Senador Gringo Honasan sa kasong rebelyon ug Nur Misuari sa pagpangu’ sa kawsa sa Mindanao.  Karon, susamang pasilidad ang gisudlan kang Napoles tungod sa kasong pagbilanggo sa iyang kabanay nga si Benhur Luy. 

Wa’ pay kaso kalabot sa pork barrel scam ang napasaka batok ni Janet Napoles.  Salamat sa nahauna niyang kasong giatubang ug nisangpot sa pagpagawas og arrest warrant ang tanan hangtud nga nitahan si Napoles.  Kung paabuton pa ang imbestigasyon sa senado o kongreso kabahin sa sayop nga paggasto sa pork barrel, maabtan pa og siyam-siyam nga igo nang makakagiw si Napoles ug uban pang nalambigit sa isyu.  Apan karon, daw nidapig ang panahon sa mga Pilipino nga dugay nang gilingla ug gitikasan sa mga senador ug kongresista pinaagi sa paggamit sa ilang PDAF sa sayop nga paagi.

Nitutok ang tanan sa kaso ni Napoles ug sa iyang bag-ong puy-anan.  Salamat sa usa ka Sugbuanong heneral, Chief Supt. Carmelo Valmoria ug nahatagan ug makasiguro ‘ta nga wa’y hokus pokus nga mahitabo kang Napoles.  Sa akong pakighinabi ni Valmoria sa programang Kumbati sa DYAB, iyang gibutyag ang mga detalye sa pasilidad nga gibutangan ni Napoles.  Adunay gidak-on nga 80 metros kuadrado ang pasilidad nga anaa su’d sa Fort Sto. Domingo.   Tungod kay gibutangan ang maong pasilidad kaniadto nilang Estrada ug uban pang mga personalidad sa gobyerno, aduna ni airconditioning unit.

Apan giklaro ni Valmoria, aron lang mapapas ang pagduda sa special treatment, gitangtang nila ang maong pasilidad ug gisemento.   Electric fan lang ang gipagamit sa alas sa pag-utingkay ning lawom nga imbestigasyon sa pork barrel scam.  Sukwahi sa pagduda nga adunay special treatment, giklaro ni Gen. Valmoria nga gisunod lang nila ang budget nga P115 sa tulo ka kan-anan alang sa mga sakop sa Special Action Force, kung diin si Valmoria ang pangu’.  Susamang budget sa pagkaon ang ilang ihatag ngadto ni Napoles.  Apan tungod kay diabetic si Napoles, ang pagkaon nga haom sa maong sakit ang itunol ngadto niya.   Giklaro ‘sab ni Valmoria nga adunay posibilidad nga hatdan og pagkaon si Napoles sa iyang kabanay.

Sa pagkakaron, mga kabanay lang ug mga abugado ni Napoles ang mahimong moduaw niya.   Apan silang tanan—gikinahanglan nga mopaubos sa istrikto nga security measure ug gidid-an nga magda’ og cellphone.   Gibutangan na ‘sab og close circuit television kon CCTV ang pasilidad aron nga mamonitor ang mga panghitabo sa su’d ug gawas sa pasilidad.   Bisan ang mga sakop sa SAF nga maoy gitahasan nga magbantay, gidid-an ‘sab nga makighinabi niya.  Adunay duha ka close-in security  personnel nga babaye nga gibutang su’d mismo sa pasilidad.  Mahimo rang makig-istorya si Napoles nila apan gidid-an sila nga maoy unang makighinabi ni Napoles.  Ang mga tawo lang nga nalakip sa listahan sa makaduaw ang mahimong makabisita.  Daw imposible kung adunay kongresista o senador nga mangahas nga mobisita ni Napoles.   Siguradong ma-aan silang dapig sa giisip nga reyna sa pork barrel scam.

Daghan ang nipiyait nga gihatagan og special treatment si Napoles.  Kung ang pagpapuyo niya sa maong pasilidad special treatment na alang sa uban, di’ nato mahimong ma-kwestyon ang ilang opinyon.  Apan likod ining mga pagduda sa pag-tratar ni Napoles, haum lang ang gihimo sa gobyerno.  Si Napoles ang giisip karon nga yabi sa daghang impormasyon kinsa ang mga tawo nga nakasapi ining pork barrel.  Kung moabot ang panahon simbako nga maangin ang kinabuhi ni Napoles tungod sa lugak o delikadong kahimtang, dakong bulilyaso ni di’ lang sa gobyerno apan lakip na sa daghang mga Pilipino nga nangandoy nga ma-undang na ang korapsyon ug masilotan na ang mga tawo nga nalambigit ini.  Alang sa mga tawo nga nag-kwestyon sa pagtratar kang Napoles, maglibog lang ‘ta asa mo pusta!

Emai: [email protected] or [email protected]