EDITORIAL - Janet mahimo diay’ng state witness?

Ingon, nga ang  balaod nagbuot  nga ang mahimong state witness  mao kadtong tawo nga labing gamay  og sala.

Sa P10 billion pork barrel scam, si Janet Lim Napoles unsa  may iyang  papel?

Di ba  siya  maoy utok nga mipaila og  mga  mini nga NGO ngadto sa mga  magbabalaod  nga  senador ug  mga  kongresista?

Ang  mga  magbabalaod  usab  nga  way  libog, kay wa nay laing  gastohanan  sa ilang  pork, hesus  dali  kaayong  misugot.

Gani  usa  sa  mga  senador  miingon  nga  di  na  niya  katungdanan  ang pagsusi  kun  tinuod ba  o di  ang  NGO  nga  gipaslakan  niya  sa  iyang  pork.

Pastilan, kaanugon  baya  sa binilyon ka pesos   nga  kuwarta  sa goberno nga   gipiyal  ning  mga  pinili  sa katawhan.

Sayon  ra man  kaayo  nilang  gilingla  ang  mga  tawo sa maong  katarungan sa pagtuo  tingale  nga  kabus  kaayo  og utok  ang  mga  Filipino.

Paita, nalipat  man  ang  mga  katawhan  sa pagpili  kanila  sa nangaging  mga  piniliay sa pagtuo  nga  kapiyalan  sa pagpanalipod  sa kuwarta  sa katawhan, apan  di man diay.

Busa  miabot  na  ang  panahon  nga wa nila dahoma aron  paninglon  sa hukmanan  ang  ilang  nahimo.

Sa bahin ni  Napoles,  kun  masuta  nga  siya  maoy may  labing  gamay  nga  kaso, mahimo  kaayo  siyang  state witness  apan  kun  mamatud-an  nga  siya  maoy  labing  dako  ug may  bug-at  nga  sala, aw  ambot  kun  unsaon  pagliso  ang  balaod  aron  pagaanan  ang  iyang  silot.