Prisoha g’yud!

Dili g’yud unta tukma nga ang mga datu nga mabilanggo hatagan og special treatment pinaagi sa pagpaestar kanila sa mga air-conditioned nga mga selda.

Apan alang kanako, kun si Janet Lim-Napoles hatagan og gamay’ng kunsuylo pagka karon, angay lang nato nga sabton. Gibilanggo na si Napoles apan anaa sulod sa air-conditioned nga selda sa Manila City Jail.

Sigurado ko nga ang iyang higdaanan hunol-hunol ‘sab dili sama sa ubang mga binilanggo nga lantay lang intawon. Pagdala ni Napoles paingon sa Manila City Jail gipasul-ob pa kini og bullet-proof vest aron nga dili madutlan og bala kun may mopusil kaniya.

Angay g’yud hinoon nga protehean si Napoles kay siya ang yawe nga masayran kinsa sa mga magbabalaud o kaha ubang mga opisyal sa kagamhanan ang nakigkonsabo kaniya aron mabulsa ang binilyon ka pesos nga Priority Development Assistance Fund (PDAF) sa mga magbabalaud.

Kun dili gud bantayan og maayo kini si Napoles, dili imposible nga siya ipapatay sa mga opisyal nga dili gusto nga sila mahibaw-an nga miapil sa pakigkonsabo aron pagbulsa sa dakung kantidad nga salapi.

Ato usa siya nga patug-anon kun kinsa ang mga “buaya” sa kagamhanan ug kun mahibaw-an na, pwede na nga kini si Napoles iipon nato sa mga banggiitang kriminal.

Anha tingali nga higayuna dili na maayong labanan sa kagamhanan si Napoles.

* * *

Giplano karon sa CITOM ug Land Transportation Office (LTO) nga mo-deputize og mga pinili nga sakop sa media aron motabang sa kampanya batok sa mga badlongong drayber.

Nindot kini nga paagi, apan usbon nako, angay’ng hashasan gayud pag-ayo kun kinsa sa mga sakop sa media ang angay’ng dawaton isip deputized agents.

Bisan og deputized na ko’ng daan sa LTO, girekomendar gihapon ko ni LTO Assistant Regional Director Arnel Tancinco. Akong giingnan si Joy Tumulak, CITOM Operations Chief, nga pilion g’yud pag-ayo kinsa ang kuhaon nga deputized agent.

Kun magpataka gud ta’g kuha og mga deputized agent, basin og magkaproblema ta sa umaabot. Kapin na ko sa upat ka tuig nga deputized agent sa LTO wala g’yud sila’y problema nako.

* * *

Nalipay ko kay gipaspasan na paghimo’g kampanya sa CITOM ang mga sakyanan nga giparking lang daplin sa karsada panahon sa gabii ngadto na sa buntag.

Apan maayo g’yud nga pangguroyon kining maong mga sakyanan aron mangita og dapit ang mga tag-iya nga kaparkingan, dili kay anha ra sa karsada iparking.

Kun may sunog, unsaon pag-agi sa mga trak sa bombero? Kamong mga hingtungdan nga lumulopyo, reklamo g’yud mo kay kun may sunog kamo ra gihapon ang maigo.