Gitahod sa simbahan ang mga binuhat nga nahisakop sa third sex

Bisan asang komunidad anaa gyud ang mga bayot ug mga tomboy. Dili sila mawala ug mapuo. Kabahin na sila sa katilingban. Ug dinhi sa atong nasud daghan usab ang sama kanila. Kaniadto bugalbugalan sila. Apan dili na karon. Gidawat na sila isip sakop sa katilingban.

Apan adunay uban nga mohukom kanila nga mahuyang ug bahin usab sa tomboy, gihukman nga mini nga pagka-lalaki.

Angay ba natong hukman nga dili maayo ang mga bayot ug mga tomboy sa atong katilingban? Kun sabton nato pag-ayo, kini sila gitahod sa simbahang Katoliko. Wa sila tamaya ug biaybiaya.

Ug gimatuod kini sa Santo Papa nga si Pope Francis sa iyang pahayag nga, wala siya’y katungod nga mohukom sa mga bayot ug mga tomboy. Sa ato pa, angay natong respetohan kining mga tawhana, kay sama ra sila kanato nga binuhat sa Diyos.

Gani, gisuportahan man ni Msgr. Esteban Binghay kining panud-ong sa Santo Papa. Miuyon si Binghay sa gipamulong ni Pope Francis. Hinuon, gipasabot ni Binghay nga dili madawat sa simbahang Katoliko ang binuhatan sa mga bayot ug mga tomboy nga nahisupak sa pagtulon-an sa Ginoo.

Mipagawas usab sa ilang opinyon ang Catholic Bishops Conference of the Philippines pinaagi ni Padre Melvin Castro nga gihangop nila ang mga bayot ug mga tomboy apan ang same-sex relationship ug  same-sex unions ang dili madawat.

Angayan lang nga atong tahuron ang mga bayot ug mga tomboy. Dili makatawhanon ug maka-Diyos kun isalikway sa katilingban kining maong mga tawhana.

Aron paghatag og igong pagtagad sa third sex, iapil sila sa mga katilingbanong kalihokan. Hinuon aduna na may mga bayot ug mga tomboy nga nagmalampuson sa ilang kinabuhi karon. Nahimong inila sa tagsatagsa nila ka kahimtang nga gisudlan.

Kining mga tawhana angay usab maghunahuna nga dili sila magmugna og salawayong mga buhat nga ikasuko sa simbahan ug ingon man sa mga tawo aron tahuron sila kanunay ug ilhong kabahin sa matarong nga katilingban.

Husto ang atong Santo Papa, wala kita’y katungod nga mohukom sa mga binuhat nga nahisakop sa third sex.