Unsay sala sa PDAF

Kagahapong adlawa girehistro sa katawhan ang ilang pagsupak sa Priority Development Assistance Fund (PDAF) nga nabantog na sa pangalang Pork Barrel. Gusto sa mga nagprotesta nga wagtangon ang PDAF kay giabuso kini sa mga Senador ug mga Kongresista.

Sa dili pa ko mopadayon, ila-ilahon usa nato ang PDAF. Ang PDAF o Priority Development Assistance Fund pundo gikan sa nasudnong gahin para sa mga Senador ug mga Kongresista. Sa nasudnong gahin ang 24 ka mga Senador adunay 200 milyones ka pesos matag usa ka nila matag tuig samtang ang 200 kapin ka mga Kongresista adunay 70 milyones ka pesos matag usa sa matag tuig.

Kining pundo nga gigahin para sa mga magbabalaud gitumong alang sa paghatag og ayoda sa katawhan sa distrito nga girepresentahan sa mga kongresista ug mga Senador lukop nasud. Adunay duha ka klase nga programa ang gigamitan sa pundo, kini mao ang hard project ug soft project. Ang hard project nga pundo gigamit kini sa pagpatukod og mga barangay hall, municipal hall, mga dalan ug mga infrastructure sa mga dapit nga paborito sa mga kongresista. Hinoon ang mga dili nila paborito kay kontra partido usahay mapiksan usab sa pundo. Ang soft project nga pundo gigamit alang sa tabang financial sa mga nabiktima sa kalamidad, aksidente, palit og tambal sa mga naospital, bayad sa ospital, scholarship sa mga tinun-an, ayoda sa mga peoples organization ug mga Non-Governmental Organization.

Apan subo ang nahitabo sa maong pundo tungod kay aduna na usay mga Senador ug mga Kongresista nga miabuso niini. Giingon nga 10 bilyones ka pesos nga Priority Development Assistance Fund ang natukob sa mga buayang Senador ug mga Kongresista pinaagi sa ilang bugos nga mga NGO'S nga maoy gihatagan sa ilang pundo. Tungod sa anomaliya gipahibawo ni Pangulong Noynoy Aquino ang pagwagtang sa PDAF.

Kun giabuso ang Priority Development Assistance Fund, nganong kini man ang wagtangon? Nganong dili man ang miabuso? Kun may wagtangon ang miabuso, dili ang pundo. Ang PDAF gahin alang sa pag-ayoda ug pagtabang. Dautan ba diay ang paggahin og pundo alang sa pag-ayoda ug pagtabang? Para nako dili. Ang dautan kadtong dili motabang. Ang dautan kadtong dili mogahin og pundo para sa pagtabang sa katawhang nanginahanglan.

Samtang akong gihangop ang protestang gipasiugdahan kagahapong adlawa, ako usab nga gikasubo ang ilang panawagang pagwagtang sa pundo alang sa pag-ayoda ug pagtabang tungod kay para kanako ang angayang wagtangon dili ang PDAF kun dili ang mga kurakot nga mga kongresista ug mga Senador.

 Gawas sa pagwagtang sa mga kurakot nga mga kongresista ug mga Senador kinahanghlan usab ang pag-usab sa dili maayong sistima sa pagpagawas sa pundo sa PDAF.