Tinuoray nga serbisyo publiko

Akong pagyukbo ngadto sa mga nagpaluyo sa Banat News gumikan ning kasaulogan karong adlawa sa anibersaryo sa pagkatukod ning nag-unang pamantalaang Binisaya sa Kabisayaan ug Mindanao. 

Ika-19 na diay ka tuig nga sirkular ang Banat News ug padayon kining misulbong aron paghatag og dekalidad nga inpormasyon ngadto sa liboan ka mga magbabasa dinhi sa Sugbo ug sa mga kasilinganang lalawigan.

Ug atol niining labing importante nga adlaw, magsugod na usab og paggawas kining maong kolum matag Biyernes. Inay matag Domingo lamang kini nga makig-uban kaninyo, mogawas na usab kini matag Biyernes alang sa dugang pagserbisyo kaninyong mga suking magbabasa sa Banat News.

Bisan pa man sa atong ka-busy sa atong inadlaw’ng obligasyon sa The FREEMAN, apan lisod balibaran ang hangyo ni editor Edwin Ian Melecio nga ipuno ang Biyernes sa paggawas ning atong lindog. Hinuon magsilbe usab kini nga hagit alang sa padayong pagyagyag sa atong opinyon sa mga init nga isyu nga nagdominar matag adlaw. 

Mapasigarbohon ako’g dako nga nahimong kabahin sa Banat News sukad pa kaniadtong tuig 1998. Ang una nakong kolum migawas sa Sports Section. Midagan kadto og pipila ka isyu hangtod nga, sa wala damha, mitabok kining maong kolum dinhi sa seksiyon sa opinyon.

Siguro pipila kaninyo ang wala masayod nga sa akong pagsugod pagtrabaho sa medya dinhi sa Sugbo, dinhi ko sa Banat News napadpad isip contributing editor. Kini gumikan usab sa pagsalig sa atong publisher nga si Juanito Jabat ug kanhi managing editor nga si pareng Johnrey Saavedra.

Sa dihang gibalhin ko sa The FREEMAN isip usa sa mga editor niini, padayon gihapon atong pagtuhik sa Banat News isip contributing editor. Midagan pa kini og pipila ka tuig. Apan karon, wala na ako’y kalabotan sa inadlaw’ng operasyon ning maong pamantalan gumikan sa dakong renda nga akong gikuptan sa The FREEMAN.    

Apan hangtud karon, padayong naglawig ang atong kolum gumikan usab sa suporta gikan ninyong mga magbabasa. Kun wala pa ang inyong pagsalig, hayan dili moabot sa ingon niini kadugay ang atong pinubreng lindog.

Niining padayong pagnabigar sa Banat News, makalaum ang atong mga magbabasa nga amoa pang pakusgan ang among pagserbisyo kaninyo. Kini pinaagi usab sa mga komprehensibong balita ug nagbagang mga opinyon nga among ihatod kaninyong mga suki matag adlaw.

Kun nahimo ang Banat News nga numero uno ninyong kauban sa inyong pamahaw matag buntag, nan padayon namong tinguha nga mas matagbaw pa kamo sa mga isyu nga among ihaon matag adlaw.

Niining anibersaryo sa pagkahimugso sa Banat News, dako among pasalamat kaninyong mga magbabasa sa kanunay ninyo nga pagsalig sa among kapabilidad paghatud og mga balita ug mga inpormasyon kaninyo.

Makalaum kamo nga mas amo pang pakusgan ang among misyon alang sa tinuoray nga serbisyo publiko.