Konsensiya ni Gillamac

Nanghinaot ko nga matinud-anon ang pasalig sa bag-ong hepe sa Cebu Provincial Police Office (CPPO) nga motabang ug mosuporta sa pamilyang Pique sa pagpadayon pag-prosecute sa kasong homicide batok kang Bella Ruby Santos ug sa Briton nga si Ian Charles Griffith.

Naluoy ko sa amahan ni Ellah Joy Pique, ang 6-anyos nga gidagit sa Minglanilla ug nakit-ang patay didto Barili, kay mitambong gyud sa change of command sa CCPO niadtong Lunes.

Mismo ang kanhi direktor sa CPPO nga si Sr. Supt. Patrocinio Comendador ang mi-text kang Renante Pique aron pahibaw-on nga ilisan na siya.

Sukad nga nahibalo si Renante nga ilisan na si Comendador gibati intawon siya og kabalaka nga mawagtang na ang suporta sa kapolisan pagtaral kang Bellah Ruby ug uyab niining si Griffith, nga maoy migawas sa imbestigasyon nga responsable sa pagdagit ug pagpatay sa iyang inosenteng anak.

Si Sr. Supt. Noel Gillamac, ang bag-ong direktor sa CPPO, nasayod nga ang dagan sa usa ka kasong kriminal magdepende sa partisipasyon sa kapolisan. Kun haguka ang mga polis, dili magsilbe ang usa ka kaso, ilabi na nga sapi-an ang sinumbong.

Si Bellah Ruby ug si Griffith nagpabiling gawasnon, ang nahauna nakalingkawas sa prisohan pinaagi sa piyansa nga gitugot sa korte, samtang ang uyab niining Briton wala na igkita sa Cebu sukad naka-eskapo paingon sa ilang lugar sa Britanya.

Kun wala pay sapi kining duha ka sinumbong, nagtuo ko nga dugay ra silang nagtingkagol sa prisohan.

Pero kay aduna man silay kaya nga ikasukol sa paningkamot sa pobreng amahan ni Ellah Joy tungod sa ilang kuwarta, ang kapolisan “vulnerable” kaayo nga mahaylo, sama sa gitug-an sa mga testigos nga gipanghaylo nga mo-atras sa ilang nahaunang testimoniya.

Sama sa mga Sugboanon nga naluoy ug naglagot – naluoy sa kahimtang sa pamilyang Pique ug naglagot sa nahidangatan sa nahaunang panglubog sa kaso ni kanhi CPPO director Erson Digal – nagtuo ko nga si Gillamac adunay konsensiya nga kamao maluoy ug maglagot.

Maluoy sa kahimtang sa 6-anyos nga inosente.

Ug maglagot sa mga naghimo sa linuog nga krimen.