EDITORIAL - Ang pagbantay batok kiriwan

Pastilan  kining  atong  mga opisyal   karon, nga   nalambigit  sa mga anomalusong  buhat  aron  masud  sa ilang  bulsa  ang  kuwarta  sa gobiyerno, wa hibaw-i  kun  di  ba  sila  maoy  labing  misaway  kaniadto  ni anhing  president  Marcos. Si Marcos  kaniadto  gidumtan  sa mayoridad  sa katawhan  tungod  kay  gawas  nga  daghang  mga  panguwarta  giingon  nga dektador  pa  usab.

Nagtuo  baya  ta  nga  ang  mopuli  kaniya  nga  maoy  modala  sa  pangagamhanan  sa nasud  mga  buotan  na,  uy  naunsa  ba  nga  misamot  man  hinuon.

Kining  P10 bilyones  nga  pork barrel scam  nga  gimaniubra  sa  usa ka  babayeng  negosyante  pagkadako  baya  niining  kuwartaha.

Kaanindot  baya  kun  kining  kantidara  gigasto  pa  lang  unta  kini  sa  mga  proyekto  nga  ikaayo  sa mga  kadalanan,  panginabuhi,  edukasyon  ug  panglawas sa katawhan.

Apan  imbis para  sa nasud, tua  ra man  sa usa  ka negosyante  nga  utro  usab  nga  maldito   sa  pagsakiyo  sa kuwarta  nga  iya  sa gobiyerno.

Apan  pila  ra  kaha  ka porsiyento  ang  bahin sa maong  negosyante  itandi    sa nahiadto  sa bulsa  sa  mga  senador  ug  mga  kongresista  nga  maoy  milunod  sa  ilang  pork  barrel  ngadto  sa negosyo  sa maong  babaye. Unya  unsa  man  usab  ang  negosyo  niini, nganong  didto  man   kaniya itubil  sa  mga  200  ka  magbabalaod  sa nasud  ang  ilang  mga  pundo?