Rabies sa pork ni Cuenco

Kamahal sa mga tambal batok sa rabies sa pinaakan sa iro. O ang kasayon ra sa pagsakay sa kadaghan sa mga kaso sa rabies. O ang kadinalian sa panginahanglan sa tambal aron nga maluwas ang pasyente sa di pa mosaka ang kagaw ngadto sa utok nga kasagaran mosangpot sa kamatayon. O ang wa lang gyo’y pupanagana nga kahakog.

Mahimong maoy nakaaghat sa mga nagpahimus sa pork barrel ni kanhi kongresista Antonio Cuenco sa pag-peke og mga kaso sa rabies ug sa paglista og peke nga ngan sa mga pasyente nga napaakan og iro. Mao say nakadapit sa pagtagad sa auditors sa Commission on Audit (COA) sa nangalisbo nilang mga transaksiyon.

* * *

Nakapatingkag sa dunggan sa auditors sa COA ang 133 ka kaso sa pinaakan sa iro nga pulos nahitabo sa distrito ni Cuenco. May nikalit ba pagsulbong nga epidemiya sa rabies sa habagatang distrito sa Dakbayan sa Sugbo? Nganong wa man mabalita sa media nga nidaghan pag-ayong napaakan og iro?

Mga dokumento nga nahipos sa COA nagbutyag nga ang tanang 133 ka kaso sa rabies sunudsunod nga nahitabo sud lang sa upat ka buwan sa duha lang ka barangay. May daghan bang irong buang  nagdungan og kabuhi ug way kukaluoy nga ni-atake sa mga molupyo sa Labangon ug Fatima?

* * *

Inay magyampungad lang sa mga dokumento ug moluom lang sa ilang mga pagduda, ang auditors nangadto sa Labangon ug Fatima. Ilang gipangutana ang mga molupyo ug mga opisyal sa barangay tinuod bang nidaghan pag-ayo ang mga napaakan sa iro?

Natinuod ang labing dako nilang kahadlok: Way bisan usa, bata ni dagko, nga napaakan og iro sa duha ka barangay sa upat ka buwan nga gihisgutan sa mga dokumento nga may 133 ka pasyente nga nangayo og tambal batok sa rabies.

* * *

Di pa gyod na mao. May 80 ka reseta sa tambal para sa pinaakan sa iro nga pinetsahan og usa ngadto sa 47 ka adlaw sa wa pang aktuwal nga paghatod sa tambal. Kun may rabies ang nakapaak nga iro puwerte untang pataya sa mga pasyente. Laing 33 ka reseta sa tambal sa rabies nga pinetsahan og usa ngadto sa 22 ka adlaw sa wa pa mahatod ang tambal. Sa ato pa, nahibawo nang mga pasyente nga mapaakan sila maong nangayo na lang daan og tambal.

Apil ni sa nakapakumbinser sa COA nga silang Cuenco ug iyang anak, Cebu City Councilor James Cuenco, umagad, Ma. Isabel Cuenco, ug higala, Sisinio Villacin Jr. sa Dell Pharmacy nakigkonsabo sa kadagkoan sa Vicente Sotto Memorial Medical Center (VSMMC) pagkawat sa P3.39 milyones nga pundo sa iyang TNT Health Program. Hangtod nga pag-abot sa Korte Suprema mga opisyal sa VSMMC na lay nahibilin.

* * *

Email: [email protected]