Ang bugno nga pangbarangay

Nagkaduol na ang bulan sa Oktobre niining tuiga nga nagtimailhan usab nga hapit na gayod ang bugno nga pangbarangay sanglit sa maong bulan gikatakda man  ang atong pagpili og mga barangay opisyal nga naglakip sa barangay kapitan, barangay konsehal ug Sangguniang Kabataan.

Nunot sa nagkaduol nga mga adlaw sa pagpahigayon og piniliay sa barangay  atong  mamatikdan karong panahona ang pagsugod na og suroy-suroy sa mga sitio ug mga purok sa mga tawo nga nagtinguha sa pagsalmot sa bugno sa politikanhong pangbarangay.

Ang mga naglingkod nga barangay opisyal nga naglakip sa barangay kapitan ug barangay konsehal  maoy maisip nga dako og bintaha kun atong itandi niadtong mga  wala pa maghupot og katungdanan kay  ang tanan niining kalihokang politikanhon  mahimo man nga kasalimbongan sa serbisyo kunohay nga matinud-anon, sama sa pagpanghatag og tambal o pagtubag sa panginahanglan sa mga molupyo nga gidala sa tambalanan. 

Dugang bintaha sa mga barangay opisyal kun itandi niadtong mga nagtinguha sa pagsalmot sa bugnong politikanhong pangbarangay mao nga ang pagpakiglambigit sa mga kalihokan nga naglakip sa pagpanglimpiyo sa palibot, pagpasiugda og konsultasyon sa mga programa nga gipatuman.

Mahimo usab nga mopasiugda og mga kalihokan ang mga barangay opisyal nga maoy gamiton ang gahin nga salapi sa ilang kaugalingong panudlanan sanglit gitumong man kini sa kaayohan sa kinabag-an.

Ang wala pa maghupot og katungdanan nga  nagtinguha sa pagsalmot sa umaabot nga piniliay sa barangay maoy labing gikinahanglan ang pagsuroy sa kabalayan isip sinugdanan sa pagpaila sa iyang kaugalingon ngadto sa katawhan nga buot pa niining alagaran.