Sulbara ni ninyo uy

Giangkon sa akong amigo nga si Joy Tumulak, ang operations officer sa CITOM, nga wala g’yud siya’y nakit-an nga maayong paagi unsaon nga kadtong mga sakyanan nga gikan sa Sudlon, Lahug dili na man tugotan nga makaliko paingon sa wala kon deselya paingon sa Salinas Drive.

Karon gud gidili ang pag-left turn paingon sa JY Square niadtong mga sakyanan gikan sa Sudlon, Lahug (kana ba’ng gikan sa Beverly Hills) gikan sa alas sayes ngadto sa alas nueve sa buntag. Bisan si Mayor Michael Rama walay maayong ideya sa pagsulbad niining maong problema. Sa among panaghinabi ni Joy Tumulak iyang giingon nga kun siya ang pagbut-on, kadtong mga sakyanan nga gikan sa Sudlon, Lahug adto niya patuyokon sa Escario Street.

Ang gipasabot niya nga gikan sa Sudlon, moliko sa tuo ang sakyanan, unya mosubay sa Gorordo Avenue paingon sa eskena Escario. Kanang eskena Gorordo ug Escario mga usa ka kilometro na gikan sa eskena sa Sudlon.

Unya, gikan sa Escario left turn adto na mangita’g paagi nga makabalik sa Gorordo aron makaabot sila sa Salinas Drive o kaha kun moadto sila sa Apas, ari moagi sa Archbishop Reyes sa Barangay Luz.

Nahakatawa ko nga namati sa sugyot sa akong amigo. Bisan tingali siya o si Mayor Rama dili mohimo niana. Mao nga makita nimo ang mga sakyanan, moliko man tuod sa tuo ug dili mo-left turn paingon sa JY Square iniggawas nila sa Sitio Sudlon, apan anha ra mo-U-turn sa atubangan sa Temple. Pastilan.

Para nako kun ipugos g’yud pagpatuman ang no left turn diha gikan sa tulo ka oras, dakpon g’yud kadtong mo-left turn, unya ayaw gamiti ninyo og Traffic Citation Ticket (TCT) kay dili g’yud na kahadlokan sa mga drayber.

Kinahanglang TOP g’yud unta ang inyong iisyu ngadto sa mga drayber. Apan sa ako na nga giingon, makasabot ko sa sitwasyon sa mga drayber.

Gipangutana ko ni City Administrator Jose Marie Poblete kun unsay akong sugyot kabahin niining maong isyu. Para nako, mahimo ra man nga ang mga sakyanan tugotan nga maka-left turn ug ang traffic enforcer maoy mobana-bana hain ang unahon niini pagpalusot.

Apan baya ning enforcer nga gibutang nila sa CITOM diha mora lang g’yud og kandela nga giugbok, tagsa ra molihok aron pag-command sa mga drayber. Maayo tingali nga mangita ka’g abtik-abtik nga enforcer Joy kanang nakakaon na para dili magluya nga mo-duty. Ang ako lang kay kun anha ra gud motuyok ang mga sakyanan dapit sa Temple, posible pa nga makamugna kini og aksidente.