Hagit sa hustisya

Ang Department of Justice nitataw nga sa di’ madugay ila nang ipagawas ang panga’n sa mga opisyal sa gobyerno nga nalambigit ining P10 billion nga pork barrel scam.  Kini ang isog nga pamahayag tunga-tunga sa padayong paningkamot nga masilotan ang mga tawo nga nakasapi sa kuwarta nga alang unta sa mga tawo.  Nagsugod ning tanan sa usa ka anak nga sa iyang pag-gara-gara nibalandra sa iyang mga mahalon nga gamit.  Ang maong lakang, nakapa-isa sa kilay sa mga tawo ug nakapangutana ang publiko gi-unsa sa pamilyang Napoles sa pag-angkon og ingon ini ka dakong kantidad su’d lang sa pipila ka tuig?   Kun ang mga Napoles ang pasultihon, lihetimo ang ilang negosyo.  Apan nganong tunga-tunga sa maong kontrobersya, hilom pa man sa payag ang bay balauranan?

Nagsanga-sanga ang isyu nga gikalambigitan sa mga Napoles partikular ni Janet.  Apan kung si Major Ariel Querubin ang pasultihon, layo na tuod og naabtan ang pamilya nga iyang naila-ila niadtong panahon nga nagyaka pa sila sa kakabus.  Ug ang sugilanon sa iyang pamilya ug sa mga Napoles layo na ‘sab og naabtan.  Karon, usa lang ang iyang hagit ug pangutana; gi-unsa sa mga Napoles sa pagpadato su’d lang sa pipila ka tuig sa iyang negosyo isip military supplier?  Ang asawa ni Querubin nga si Lorie, namatay tungod sa grabeng konsumisyon dihang wa’ gi-uli ni Janet Napoles ang iyang gibubo nga puhonan sa negosyong gitanyag ni Janet.  Niabot sa punto nga naglalis ang duha apan wa’ gyud mabayri si Mrs. Querubin.

Sa unang adlaw sa haya, niduaw pa si Janet Napoles ug didto iyang gibayran ang iyang utang kang Lorie sa dolyar.  Igo na lang sa pag-ingon si Querubin nga pagbuot ang tanan sa kahitas-an apan ang kaguol nga gibati sa usa ka militar, di’ matago hangtud karon labi pa ning panahon nga nalambigit sa pork barrel scam ang pamilya Napoles.   Matawag nga adunay lawom nga koneksyon ang duha ka pamilya.   Si Jaime Napoles, ang mister ni Janet, susama og ranggo ni Querubin kaniadto sa Philippine Marines.  Atol sa sunod-sunod nga coup de’ tat batok sa administrasyong Cory Aquino.  Pareho nga nabilanggo ang duha ka opisyal.  Apan si Querubin nagpadayon sa iyang katungdanan, si Napoles nitabang sa bag-ong natukod nga negosyo sa iyang asawa.  Wa’ magtuo si Querubin nga ang maong negosyo ang makapasangit sa pamilya ning bag-ong kontrobersiya

Ang tinguha sa DOJ sa paggukod sa mga tawo nga nakabenepisyo sa pork barrel scam usa lang ka lakang sa pagsilot sa mga tawo nga nalambigit.   Ang maong lakang magpabilin lang nga ingon ini kung mismo ang publiko di’ malungtaron sa ilang tinguha nga masilotan ang mga tawo nga nangurakot sa gobyerno.  Gipanlantaw nga maapil sa imbestigasyon ang mismong mga kaalyadong politiko sa administrasyon.   Kini ang mosuway unsa ka ligdong ang tinguha ni Presidente Noynoy Aquino alang sa tul-id nga da’n pinaagi sa pagsumpo sa dugay nang sakit sa katilingban.  Apan kun igo lang sa pag-ingon ang mga tawo nga ihangad lang nato ang tanan sa kahitas-an o ang gaba na lay bahala nila—di’ na sila madutlan ini.  Ang mahinungdanon ining mga tawhana nga nakakawat sila sa gobyerno ug nabutang sa haruhay ang ilang pamilya.

Ang pork barrel scam na ang labing dakong pagsuway ining maong administrasyon.   Unsay mamahimong reaksyon sa presidente kung ang mismong maligsan sa imbestigasyon ang iyang mga tawo nga iyang gidani ug nagpailang kauban sa pagsubay sa tul-id nga dan.   Si Manila Archbishop Jose Antonio Cardinal Tagle sakto sa iyang sa pamahayag nga kining mga tawo nga nagpadato pagmaayo sa sayop nga paagi nawagtangan na gyud sa konsensya.   Sakto ‘sab si Tagle sa iyang obserbasyon nganong wa’ pa tay nakit-an nga mga tawo nga nagkisi-kisi sa kadalanan pagpahigayon og welga aron nga mas mapugos ang gobyerno pag-imbestigar ining maong kontrobersiya.  Sakto ka sa imong pangagpas nga makalimtan ra ning tanan tungod kay mas pilion nato kanunay nga magpakahilom na lang batok sa dautan ug batok sa mga tawo nga nagpuyo sa ka ngitngit.

Email: [email protected]. or [email protected].