Damay ka sa kilat

Kun tugotan sa Energy Regulatory Commission ang Visayan Electric Company (VECO), madugangan og kapin sa 5 pesos na unya ang imong bayranan sa kuryente matag buwan kun moabot og usa ka gatos kilowat matag oras ang makonsumo nimong kuryente. Hinuon giklaro sa VECO nga kutob lamang sa tulo ka buwan ang pagpangolekta nila sa dugang bayranan.

Ang gipangayo sa VECO nga umento sa bayranan sa kuryente sulod sa tulo ka buwan ilang ibayad sa pagpaayo sa ilang transformer nga naguba human maigo sa kilat niadtong Mayo 27 sa miaging tuig nga nagkantidad og dul-an 35 ka milyon ka pesos. Busa gidamay ka sa VECO sa ilang suliran sa kilat. Makataranganon ba ang ilang gihimo nga ikaw nga konsumedor ang pasahan sa ilang suliran? Makataranganon seguro kun wala pa sila magpabaya ug mituman pa unta sila sa gilatid sa balaud.

Sigun sa Epira law ang mga public utility sama sa Visayan Electric Company gimandoan sa pagbutang og mga ekipos nga pangkontra sa kilat apan mura’g wala kini sunda sa VECO ug kun gisunod man seguro gubaon ang ilang gibutang kay naguba man sa kilat ang ilang transformer.

Tan-awa ra ninyo ang VECO suwapang! Sa dihang wala pa gub-a sa kilat ang ilang transfomer padayon ang ilang kalipay sa pagbahin sa ilang ginansiya ug wala gyod ta nila paapila. Karon nga giguba sa kilat ang ilang transformer gusto nilang ipadayon ang ilang kalipay kay dili sila gustong mogasto, ang gusto nila pulos lang ginansiya maong ang bayronon sa pagkaguba sa ilang transformer ang mga konsumedor pa ang pabayron.    

Kay nakahalata nga wala makauyon ang mga konsumedor milikoy sa ilang rason ang VECO, ilang giilisan ang ilang rason. Giingon na sa VECO nga dili ang pagpaayo ug pag-instalar sa ilang transformer nga naigo sa kilat ang rason sa umento sa bayranan sa ilang kuryente kun dili ang ilang bayranan ngadto sa East Asia Utilities Corporation nga ilang gipalitan og kuryente aron ma-distribute sa mga konsumedor. Ang VECO mipalit og kuryente sa East Asia Utilities Corporation bisan mahal tungod kay nagkulang ang kuryente nga ilang ma-supply sa mga konsumedor human maigo sa kilat ang ilang transformer. Motoo ka na ba sa rason sa VECO?