Hadlok si Mayor

Human sa among press conference kagahapon didto sa Cebu City Hall, nakahigayon ko pagpadangat personal ngadto ni Mayor Michael Rama sa problema sa mga motorista matag buntag – kadtong gikan sa Sudlon, Lahug nga buot moadto sa Salinas Drive.

Dili man sila makadiritso og liko paingon sa JY Square kay aron dili makabalda sa paglusot sa mga sakyanan nga gikan sa Salinas Drive paingon sa direksyon Lahug Elementary School.

Resulta, ang mga awto ug motor nga gikan sa Sitio Sudlon nga mopaingon unta sa JY Square, moliko tuod sa tuo apan adto ra mobalik sa unahan nga maoy makapasamot sa kapeligro ug kahasol nga makamugna og peligro.

Misuway paghatag og sugyot-sulbad si Mayor Rama kabahin sa maong problema ug kay wala may “U-Turn Slot” dihang dapita, adto na kuno sa Gorordo Avenue atubangan sa University of the Philippines (UP) himoan og U-turn slot apan anha ra sa karsada.

Wala ko ma-sold out sa iyang ideya. Wala man gud masuheto si Mayor Rama sa sitwasyon dihang dapita nga lisud ang pagbutang og U-Turn slot dapit sa UP kay hapit walay hunong ang mga sakyanan nga magbanos-banos pag-agi – pikas ug pikas. Kini maoy angay’ng lingkoran gayud pag-ayo sa mga sakop sa CITOM Board kun asa sila magbutang og U-Turn slot. Dili ko makabasul sa mga drayber nga anha ra mo-backing diha dapit sa Temple.

Dili kini angay’ng langay-langayon ra sa kadagkoan sa CITOM, ilabi na ni Mayor Rama. Dunay sugyot ang mayor nga pahakan ang dapit sa eskena unahan sa taytayan aron molapad ang agianan sa mga sakyanan, apan ang problema, kanus-a niya ipatuman?

Dili man gud masulbad ang problema pinaagi lang sa sulti, kinahanglang buhaton. Nagpakabana ko niining maong isyu kay mata’g buntag makakita ko sa maong talan-awon diha.

* * *

Walay alegre ang sesyon sa konseho karong buntag kay mora’g dili patambongon ni Mayor Rama ang iyang mga department head aron tukion unta ang financial matters sa dakbayan.

Kun makatunga pa unta ang City Treasurer, City Budget Officer, City Administrator ug City Accountant, ilabi na nga anaa ang City Resident Auditor, masayran g’yud unta kun unsay tinuod nga sitwasyon sa atong panudlanan sa dakbayan.

Mosugot man si Mayor Rama nga motambong ang mga executive officials sa sesyon sa mga konsehal apan kinahanglang himoon kini sa executive session, dili sa public hearing.

Sa public hearing gud bukas man kini sa tanan, samtang sa executive session mahimo nga dili nila patambongan. Apan unsa may kahadlokan nato? Total ang isulti ang tinuod man?