Ordinansahon ni Carillo

Na-unsa naman ni si Konsehal Gerry Carillo?

Human mapasanginli nga namunal og bato sa ulo sa usa ka bata nga anak ug igsuon og mga polis nga taga Ermita, wala na may maayong hinunahunaan isip miyembro sa Konseho sa dakbayan sa Sugbo.

Tiaw mo na, misang-at og ordinansahon si Carillo nga maghatag sa mga centenarian (mag-edad 100) nga mga tigulang og P1 milyon gikan sa P100,000 lamang.

Naglibog ko. Ang bata man unta ang giingong gihampak ni Carillo og bato, nganong hasta man ang iyang ulo ang naapil og katay-og?

Bitaw walay sagol komedya, kanang P1 milyon dako ra kaayo na, ug siyaro wala gyud makahunahuna si Carillo nga aduna pay daghang mga concerns ang siyudad sa Sugbo nga angay gastohan gikan sa kuwarta sa panudlanan.

Kanang Colon area mura og baybayon sa Pasil kun mokusog ang ulan, apan kulang ang pundo sa siyudad alang sa integrated drainage system.

Ang rason ni Carillo nga ang paghatag og P1 milyon sa mga centenarian mag-encourage sa mga pamilya nga mogalam sa mga tigulang wala gihapon masubay sa hustong logic.

Ang tigulang anang panahona walay kalibutan unsay kagamitan anang P1 milyon nga i-award sa siyudad. Ang malipay ana mao ra ang mga miyembro sa pamilya.

Ang P1 milyon dili makapalabang sa gitas-on sa edad. Ang pagpataas sa edad magdepende sa estilo sa pagpuyo (lifestyle) sa tawo.

Mag-unsa man og amping ang mga sakop sa pamilya sa usa ka tigulang kun kining tigulanga wala mag-amping sa iyang kaugalingon sa dihang nagpaingon pa siya sa pagka-tigulang.

Sa atong palibot karon sa Pilipinas nga bisan asa ang polusyon sa baho, hugaw, basura, kasaba ug panan-aw, nagtuo si Carillo nga makaabot siya anang edara? Samot na kun kada gabiing mag-estambay sa mga imnanan.

Mopakpak pa tingale ang mga Sugboanon niya kun maninguha siyang makapangasaba ngadto sa mga barangay nga hilabihan kabaho ug kahugaw, sama nianang among barangay San Nicolas Proper karon nga puwerteng bahoa duol sa barangay hall.

Ang kapitan diha nga si Boy Desamparado nga maoy gitabangan ni Carillo nga makadaog niadtong 2010 barangay elections, wala gani kasulbad anang mga basura nga naglaundok duol sa barangay hall.

Kanang problemaha sukad pa gyud na kaniadtong wala pay barangay election sa 2010.

Unya na lang ko motuo sa pilosopiya anang ordinansahon ni Carillo kun si Kapitan Desamparado makaabot og 100-anyos samtang magpunay og singo anang kabaho sa Tabo-an public market, duol anang barangay hall.

* * *

Ang administrasyon ni Mayor Mike Rama daghan pa og gukdonon nga mga trabahoon aron mapatunhay pa ang fiscal management niini, taliwala sa mga pahimangno sa Commission on Audit sa mga lapso pagpadagan sa ilang panudlanan.

Kini maoy unod sa sulat pahimangno sa COA kang kansang dokumento naabot sa among lamesa sa CCTN Channel 47 niadtong miaging semana gikan sa wala magpailang tinubdan.

Sa akong pag-utingkay, wala koy nakitang tilimad-on sa kapeke sa mga papel, busa gibasa ko kini.

Sa unang panid, si Sabiniano Cabatuan, direktor sa COA-7, mipahimangno sa kagamhanan sa dakbayan nga pagsunod sa hustong pamaagi pagpagawas og pundo ug ang pagdumala niini.

Sa Value for Money audit sa P10.2 milyones nga pundo alang sa Supplementary Feeding Program sa siyudad nga gipagawas sa DSWD ug sa paghimo og mga seminar ug training. Nakakita ang COA og “deficiency” apan gipahimangno nga ipa-reconcile.

Sa sulat ni Delia Monte de Ramos, supervising auditor sa COA, ngadto kang direktor Cabatuan, gituki niini ang 18 ka mga lapso pagpadagan sa panudlanan sa dakbayan.

Apil na niini ang balanse sa Cash in Vault (kutob Disyembre 31, 2012) nga adunay nakitang “unreconciled balance” nga P8,228,961.14 tali sa rekord sa accounting ug sa City Treasurers Office. Tiaw mo na, duha ka buhatan sa City Hall nagyagaw ilang record.

Gituki usab ang “overstatement” sa account balance sa siyudad sa kantidad nga P12,149,474.88 sa lima ka PNB bank accounts (kutob Disyembre 31, 2012), apan nahibaw-an nga nasira na diay ang maong bank account.

Apil na dinhi ang pagkasakop sa kalangay sa siyudad pagsumiter sa mga kontribusyon alang sa Pag-IBIG, Philhealth, GSIS ug BIR sa mga empleyado.

Sayo pa kaayo kun moingon kitang dili makamao si Mike mopadagan sa panudlanan sa siyudad.

Apan por dios, ikaduhang termino na kini niya, ug hinaot nga walay kasong manglupad ini’g entrada niya sa ikatulong termino tungod sa kapakyas pagsunod sa COA rules and procedures.

Hain na man diay ang mga tang-an nga mga auditor ug financial adviser ni Mike?