Programa sa Telebisyon
Karong panahona nahimong komon na lang kaayo ang telebisyon. Dili sama kaniadto niadtong bata pa ako nga makontento na lamang ako sa mga drama sa radyo uban nila ni Teban ug Goliat. Matag bata ang nahimong exposed na kaayo sa telebisyon karong panahona. Apan unsa man angayang himoon sa mga ginikanan aron mamahimong mas himsog ug hamtong ang paggamit ning maong teknolohiya uban sa ilang mga anak? Haom ba nga ang Telebisyon himoon nilang surrogate parent hulip kanila kay kun wala sila makontento man lang ang bata sa pagyampungad atubangan sa telebisyon? Kini ang angayang himoon sa responsableng ginikanan:
1. Ang pagbutang sa telebisyon sa mas dayag nga dapit diha sa panimalay. Mas maayo usa lamang ka Telebisyon sa panimalay.
2. Ang paghimo og pagsusi sa mga naandang programa sa telebisyon nga haom alang sa kabataan.
3. Pagdasig sa imong anak nga iyang ilista ang mga programa sa telebisyon nga buot niyang tan-awon gikan sa iyang paborito ug niadtong wala siya’y gusto.
4. Ang pagsusi o pagtimbang-timbang kun ang maong mga pasundayag nakahupot ba og mga mapintas nga mga esena (violent scene) o malaw-ay nga esena (dirty scene). Bisan gani ang pasundayag nga cartoon ang usahay anaa man niini.
5. Ang pagtan-aw og Telebisyon kuyog sa imong mga anak ang dako kaayo og kahimoan aron imong makuyogan ang imong kabataan diha sa ilang panaw ginamit ang entertainment media. Kini ang kahulogan sa gitawag natong Rated PG kon Parental Guidance.
- Latest
