Unsay buhaton kun mabiktima sa illegal recruiter?

Daghan sa mga Pinoy nga gustong manarbaho abroad ang nabiktima hinuon sa mga illegal recruiter. Tungod niini, importante alang sa mga aplikante ang pagsubay gyud ngadto sa buhatan sa OWWA ug uban pang ahensya sa atong gobierno kun rehistrado ba ug unsay background sa agency nga mi hire kanila. Apan kun ikaw nabiktima sa illegal nga pagpang-recruit unsay angayan nimong buhaton? Kana nga pangutana ang atong tubagon karon pinaagi sa atong column

Dear Atty. Divine,

Aduna lang unta ko’y ipangutana kanimo may kalabutan sa akong agency nga giaplayan og trabaho alang sa gawas sa nasud. Nagbayad ko og placement fee nga miabot og P200,000 aron ko makatrabaho sa Singapore. Ila kung gisaaran nga patrabahuon sa usa ka construction firm isip office staff. Pag-abot nako sa Singapore, uban sa laing mga pinay kay mga lima mi kabuok nga gipadala ngadto sa maong ahensya, it turned out nga usa ka bar ang among trabahoan. Maayo gani kay adunay mitabang namo nga OFW ug nakauli mi dayon. Karon plano unta nako nga ikiha ang maong agency ug gusto sab nako nga bawi-on ang akong gibayad nila nga placement fee. Unsa may kaso nga akong ipasaka? Asa man ko modangop? Hinaut nga imong matubag ang akong pangutana. — Josie

Dear Josie,

Daghan na sa mga Pinay o Pinoy ang nangabiktima niining mga agency nga diin gawas nga ilang pangayoan og dagkong placement fee, ang uban di gyud makalarga samtang ang uban makalarga man apan nahimong undocumented pag-abot sa gawas sa nasud ug ang uban gihatagan og trabaho nga sukwahe sa ilang gisaad sama kanimo. Ang nahitabo kanimo ug sa imong mga kaubang pinay usa ka matang sa Human Trafficking tungod kay kamo gisaaran nga patrabahuon abroad apan pag-abot didto himuon diay kamo nga mga prostitute. Kini usa ka kalapasan sa Republic Act 9208 kon Anti-Trafficking in Persons Act of 2003. Basi sa maong balaod kini nagkanayon nga: “it is unlawful for any person, whether natural or juridical, to recruit, transport, provide, or receive a person or persons by any means, including those done under the pretext of domestic or overseas employment or training or apprenticeship, for the purpose of prostitution, pornography, sexual exploitation, forced labor, slavery, involuntary servitude or debt bondage (Section 4 (a), id).” Sa ato pa, mamahimo kang mopasaka og kasong kriminal batok sa mga tawong nagpaluyo sa imong recruitment. Ang imong kaso mamahimong ipasaka sa Office of the City o Provincial Prosecutor diin nahitabo ang pag-recruit kanimo. Kun mapamatud-an ang kaso nga imong gipasaka batok kanila, ang mga opisyal sa maong agency o mga tawong nagpaluyo sa pag-recruit kanimo mamahimong mabilanggo sud sa 20 ka tuig ug mamultahan og usa ngadto sa duha ka milyon ka pesos. Gawas sa imong kriminal nga kaso, mamahimo sab kang mangayo og damages batok sa mga nag-recruit kanimo. Kun rehistrado sa Securities and Exchange Commission kon SEC ang maong recruitment agency hayan ma-revoke o ma-cancel ang lisensya niini ug dili na unya sila tugotan nga maka operate pa. Ang maayo nimong buhaton karon mao ang pagpasaka og kaso batok sa mga tawong nalambigit sa pag-recruit kanimo aron paghatag kanila og leksyon kay posible nga daghan pa unya ang ilang mabiktima. Kun mapasaka na sa Korte ang imong kaso, ang fiscal na unya ang mo-prosecute niini busa mamahimo ra nga dili ka mokuha og imong private lawyer. Hinaut nga akong natubag ang imong pangutana. Daghang salamat and God Bless.— Atty. Divine

Alang sa inyong pangutana, ipadala lang ang inyong suwat sa Legal Corner sa Banat News sa V. Gullas Street, Cebu City or email sa [email protected]. og akong tubagon ang inyong pangutana matag adlaw’ng Miyerkules ug Domingo pinaagi sa akong column.