Sila ra ang nagyonang sa bahandi

Sa gipagawas sa Forbes Magazine's nga listahan sa mga dato sa Pilipinas nag-una gihapon si Henry Sy nga tag-iya sa SM sa pinakadato nga adunay bahandi nga 12 bilyones dolyares. Nagsunod ni Henry Sy ang tobacco ug airline magnate nga si Lucio Tan nga adunay 7.5 bilyones dolyares samtang nahimutang sa ikatulong dapit ang tag-iya sa Alliance Global nga si Andrew Tan nga adunay 4.6 bilyones dolyares nga bahandi. Kining tulo pulos nanglayat ang ilang bahandi kun ikomparar sa miaging tuig.

Sa miaging tuig si Henry Sy aduna lamay 9.1 bilyones dolyares nga bahandi apan napun-an kini og 2.9 bilyones dolyares sa unang quarter ning tuiga. Ang 4.5 bilyones dolyares nga bahandi ni Lucio Tan sa miaging tuig nadugangan usab kini og 3 bilyones dolyares samtang si Andrew Tan nga nahimutang lamang sa ika unom nga dapit sa miaging tuig sa bahandi nga 2.3 bilyones dolyares milayat kini sa ika tulo nga dapit tungod sa iyang 4.6 bilyones dolyares.

Nahimutang sa ika upat nga dapit ang tag-iya sa International Container Port ug Solair Resort and Casino nga si Enrique Razon Jr. nga adunay 4.5 bilyones dolyares samtang ang tag-iya sa GJ Summit nga si John Gokongwei Jr. nahimotang sa ikalimang dapit sa iyang 3.4 bilyones dolyares nga bahandi. Gisundan sila nila ni Jaime Zobel de Ayala nga adunay 3.1 bilyones dolyares, pamilyang Aboitiz nga adunay 3 bilyones dolyares, David Consunji nga adunay 2.7 bilyones dolyares, George Ty nga tag-iya sa Metrobank nga adunay 2.6 bilyones dolyares ug sa tag-iya sa Puregold nga sila si Lucio ug Susan Co nga adunay 1.9 bilyones dolyares. Naapil na usab sa billionaires' club sila si kanhi Senador Manny Villar nga adunay 1.05 bilyones dolyares ug ang tag-iya sa Filinvest nga si Andrew Gotianuy nga adunay 1 bilyon ka dolyar.      

Mga milyonaryo usab sila si Ramon Ang ang Chief operating officer sa SMC nga adunay 260 milyones dolyares, Manuel Pangilinan sa PLDT nga adunay 105 milyones dolyares, Jorge Araneta sa Araneta Group nga adunay 505 milyones dolyares, ang tag-iya sa Oishi nga si Carlos Chan nga adunay 500 milyones dolyares, ang tag-iya sa Harbour Center nga si Michael Romero nga adunay 490 milyones dolyares, ang tag-iya og  minahan nga si Walter Brown nga adunay 270 milyones dolyares, ang tag-iya sa Zest-O nga si Alfredo Yao nga adunay 180 milyones dolyares, ang tag-iya sa Megawide Construction nga si Edgar Saavedra nga adunay 170 milyones dolyares, Lourdes Montinola sa Far Eastern University nga adunay 155 milyones dolyares, Luis Virata sa Nickel Asia nga adunay 120 milyones dolyares ug Philip Ang nga adunay 115 milyones dolyares. Ang tag-iya sa Mang Inasal nga si Edgar Sia mao ang pinakabatan-on nga nalakip sa mga elite nga milyonaryo nga adunay bahandi nga 210 milyones dolyares sa pangidaron nga 36.

Ang Forbes Magazine nagkanayon nga ang bahandi niining maong mga bilyonaryo ug elite nga mga milyonaryo misulbong gumikan sa 7.8 porsiyento nga pagsaka sa ekonomiya sa unang quarter ning tuiga bisan og nagpabilin ang suliran sa kakuwang sa trabaho. Busa klaro ug tataw nga ang mga bilyonaryo ug mga milyonaryo lang ang nakapahimulos sa paglambo sa ekonomiya kay samtang sila nagyonang sa ilang bahandi, ang mga kabus naligo sa tumang kawad-on ug kalisod.

Ang mga bilyonaryo ug milyonaryo sa nasud nakatabang ba sa paglambo sa atong ekonomiya? Ang tubag dakong OO. Pero samtang nakatabang sila sa paglambo sa atong ekonomiya kita usab ang nakapabilyonaryo ug nakapamilyonaryo nila. Nakahibalo namo kun ngano! Ang inyong pagkalaagan sa SM ug Ayala ug ang inyong pagkahingaon og manok ang dakog gikatampo sa pagburot sa bahandi sa mga bilyonaryo ug milyonaryo.