Reporma sa customs
Tungod sa kaguliyang nga namugna diha sa Bureau of Customs human sa SONA ni Presidente Aquino, nagkapuliki ang mga opisyal sa nahisgutang ahensiya pagpatuman og reporma.
Usa sa labing unang reaksiyon mao ang pagluwat sa katungdanan ni Commissioner Ruffy Biazon ug sa mayoriya sa iyang mga deputies. Apan ang resignation ni Biazon wala dawata ni Aquino samtang ang ubang opisyal nag-ung-ong pa sa pagkakaron.
Human balibari sa presidente ang iyang resignation mipakita dayon og hilas si Biazon pinaagi sa pag-awhag sa tanang district collectors nga moluwat sa ilang mga pwesto aron kuno paghatag og agianan sa reporma.
Karong bag-o ang haring gangis na gyud sa Department of Finance diin sakop ang customs ang miingon nga usa sa mga reporma nga ilang nahunahunaan mao ang paghatag sa ubang trabaho sa customs ngadto sa Bureau of Internal Revenue aron kuno maminusan ang corruption.
Matud ni Finance Secretary Cesar Purisima nga ilang plano nga ihatag ngadto sa BIR ang accredition ug post-audit function sa customs.
Kini tungod sa information infrastruction sa BIR nga magamit pagpalambo sa tax collection sa gobyerno.
Ang tinuod nga problema sa ahensiya dili kun kinsa maoy mohimo sa accredition o post-audit kun dili ang kultura sa pagpangurakot.
Bisan kinsa pay tahasan paghimo niini kun magpabilin ang kultura wala gihapon kini kapuslanan.
Basin nakalimot si Purisima nga ang BIR usa sab sa giilang labing kurakot nga ahensiya. Dili kaha nga mas gipalapdan lang hinuon sa gobyerno ang pagpangurakot diha sa pantalan?
Usa sa suliran nga giatubang sa ahensiya sa pagkakaron mao ang mismanagement. Sa laktud ang unang reporma nga angayang buhaton sa customs mao ang pagtangtang ni Biazon nga way hibangkaagan sa iyang trabaho.
Dali rang malipat si Biazon sa mga tang-an diha sa pantalan tungod kay kuwang siya sa kaalam sa mga pasikotsikot sa customs. Dili siya qualified sa pwesto nga iyang gihuptan. Unsa may nahibaw-an sa medtech ug politiko sa hinangaw diha sa aduwana?
Pruweba nga dili haum si Biazon sa pwesto mao ang iyang kapakyas pagkab-ot sa iyang target collection sulod na sa kapin sa usa ka tuig.
Ang datus sa DOF nagpakita nga wala makab-ot ni Biazon ang iyang collection target sa miaging sunodsunod nga 14 ka buwan. Sa miaging tuig ang customs dunay target nga P347.07 billion. Apan ang iyang nakolekta mikabat lang og P289.87 bilyones.
Ubos sa Republic Act 9335 o ang mas naila nga Attrition Law, ang opisyal nga mapakyas pagkab-ot sa iyang target og dili mo minus 7.5 porsiento kinahanglang taktakon sa serbisyo.
Kun wala makuha ni Biazon ang iyang target sulod na sa 14 ka buwan angayan lang tingali nga mobiya na siya sa pwesto ug dili magpahawid sa presidente kun duna siyay uwaw.
Kun seryoso sab si Aquino nga makab-ot ang reporma nga iyang gusto angayan niyang tangtangon si Biazon og hulipan og mas kalipikadong opisyal.
* * *
- Latest
