Teleponong way kuptanay

Mao pa lang gani pagpanghambog nako sa Facebook nga na-update na ngadto sa Android 4.3 ang operating system sa akong Nexus 4 samtang naglawig mi sa Tañon Strait gikan sa Bato, Samboan sa Sugbo paingon sa Tampi, Amlan sa Negros Oriental sakay sa barge sa Maayong Shipping nagdamgo na sab ko karon pagpalit og bag-ong telepono.

Nakapatubod sa akong laway ang mao pa gyoy paglugwa nga Moto X, ang labing unang telepono nga nahimo sa Motorola human napalit sa Google duha ka tuig nang nilabay. Ambot kanus-a pa ni mabaligya sa mga tindahan sa Pilipinas. Apan di na kong kapaabot. Nagsusi nang daan unsaon pag-order online.

* * *

Duha ka abilidad sa Moto X, nga wa sa ubang smart phones apil ang iPhone ug Nexus, nga nakapakumbinser nako pagwaldas sa akong hiniposan:

1. Una, ang katakos pagletrato sud lang sa usa ug tunga ka segundo gikan sa pagkuot sa nakatug pang telepono sa bolsa, pag-uyog ini, pagpunting sa letratohan ug pagtuslok sa bisan asang bahina sa screen pagkuha og hulagway o pagduot sa screen aron pagkuha og daghang hulagway; ug

2. Ikaduha, ang talagsaong kamadaginuton sa bateriya kay mahimo rang lilion ang oras ug ang notifications sa bag-ong text o email messages sa way pagpaandar sa telepono.

* * *

Nadani sab ko sa labing dakong alas sa Moto X apan nabalaka hingpit bang kapuslan: Touchless control. Magsige og paminaw ang telepono bisan naa sud sa imong bolsa ug wa nimo paandara unsay imong himuon ug asa ka paingon. Mahimong suguon pag-text o pagtawag o pagtokar og kanta o pagbanabana unsang orasa moabot sa imong destinasyon human molitok og “OK, Google Now.”

Nanagana ko sa kapuslanan ini kay sa akong pagsuway sa voice commands sa akong Nexus naglisod pagsabot ang Google nako. Ang iningles ra sa akong asawa maoy masabtan sa ilang servers. Manghinaot kong mas makasabot nang Google nako karong may Cebuano translator na ug nakat-on na sa mga pinulongan ug lahing iningles sa Asya.

* * *

Daghan pang dugang masaaron nga abilidad ang Moto X: Baterya nga molungtad og 24 oras; 4.7 ka pulgada ang screen; may 18 ka kolor sa back covers ang kapilian ug 2,000 ka kumbinasyon sa mausab-usab nga mga bahin sa telepono; ug ang labing madanihon alang sa tihik nga mga konsumidor sama nako mao ang P8,000 ngadto sa P10,000 rang presyo alang sa 16 gigabytes o 32 gigabytes nga memory.

Nakabentaha ang Moto X sa ubang Android phones ug bisan sa Nexus sa Google nga hinimo sa ubang manufacturers kansang kinakusganong katakos sa software nalimitahan sa hardware. Sa bahin sa Motorola ang hardware maoy unang gidesinyo aron mohaom sa ingon kabuhian ang kinatibuk-ang kiat sa software.

* * *

Email: [email protected]