Dugang bugas saBigasan ng Bayan

Gidugangan  sa National Food Authority (NFA) ang rice allocation sa ilang Bigasan ng Bayan outlets  nga maoy ilang paagi sa pagtabang sa mga konsumedor nga nakasinati sa pag-usbaw sa presyo sa  matag kilo sa gibaligya nga commercial rice sa mga public  market ug dagkong mga mall.

Si Nestor Alcoseba nga maoy provincial manager sa NFA sa Sugbo sa iyang pamahayag miingon nga gikan sa 100 lamang ka sakong bugas nga maoy naandan  maoy ilang gihimo ang pagdugang pa ngadto na sa 200 ka sako.

Matud pa niya nga naandan na kini nilang gihimo sa matag tuig sa mga bulan nga layo pa ang  ting-ani nga ang mga konsumedor makasinati gayod og gamay nga pag-usbaw ang  presyo sa matag kilo sa bugas.

Dugang pa niya nga tuyo lamang nila ang paghinayhinay og dugang sa mga sinakong bugas sa NFA ngadto sa ilang Bigasan ng Bayan sa pagbalanse sa presyo nga posibling sakyan sa mapahimuslanong magpapatigayon.

Gitataw niya nga kun dili makasugakod sa pagpalit ang mga konsumedor sa commercial rice  aduna pa kini kapilian nga NFA rice nga gibaligya sa matag Bigasan ng Bayan nga P27 lamang ang matag kilo.

Gipaniguro niya nga ang NFA rice  nga ilang makompetensiya ang kaanindot niini ngadto sa commercial rice ug dili usab masinati ang pagnihit kay daghan pa man niini sa ilang bodega.

Dugang pa gayod nga sinakong bugas nga gikan sa Tagalog Region nga gipadala dinhi sa rehiyon nga de kalidad gihapon nga susama sa commercial rice apan  gibaligya lamang og P32  ang matag kilo maoy gitugbang sa commercial rice nga P40 ang matag kilo.