Romana gitutokan pag-ayo

Ang mga mabuot nga katawhan dinhi sa dakbayan sa Sugbo nagtutok karon kanunay sa mga lihok ni Senior Superintendent Noli Romana, ang bag-ong direktor sa Cebu City Police Office.

Nabaniog man gud nga si Romana wala gayud mohimo og hugtanay nga kampanya batok sa illegal nga sugal diha nga siya pa maoy direktor didto sa Negros Oriental Police Provincial Office.

Siyaro og pakauwawan ni Romana si Mayor Michael Rama nga mao g’yud ang mikuha kaniya bisan pa man og gibutyag na ni kanhi Police Regional Office (PRO)-7 director Marcelo Garbo nga dili maayo’g agi kana si Romana sa kampanya sa illegal nga sugal.

Kun pananglit dinhi sa dakbayan sa Sugbo pasagdan lang ni Romana ang naghitak nga illegal nga sugal nga mibalik na paghinay-hinay human nga si Garbo nawala dinhi sa Sugbo, angay nga si Mayor Rama maoy atong sawayon pag-ayo.

Hinumdumi ninyo nga ang “control ug supervision” sa kapolisan ilabi na sa kampanya batok sa illegal nga mga sugal anaa gayud gisandig sa abaga sa mga mayor.

Mangita mo kun asa kini nga balaud? Basaha ang Republic Act 8551 kay giklaro gayud diha nga ang mayor maoy gitahasan sa pagpangita’g paagi nga masumpo ang illegal nga sugal sa iyang dapit.

Espoko mo nga pwerte man ang pagkuyanap sa sugal nga masyaw dinhi sa dakbayan. Sa kadaghan sa mga trabaho ni Rama, nasiguro ko nga nakalimot na siya nga panahon nga konsehal pa siya kaniadto, apil gani tingali siya nga mihimo sa City Ordinance 1616.

Mao kini ang ordinansa nga nagdili ni bisan kinsa sa pagpamuhat, pagbaligya ug paghupot og mga tipsheets sa masyaw. Apan nganong wala man lagi aksyoni kining mga printing press diha sa Sikatuna Street nga maoy tighimo niining mga tipsheets sa masyaw?

Hapit matag adlaw, tag-walo ngadto sa napulo ka text messages ang akong madawat nga misiyaw na usab ang masyaw sa ilang mga lugar. Dili ra kay dinhi sa dakbayan sa Sugbo ang masyaw, bisan sa ubang dapit sa probinsya.

Gawas sa masyaw, makadawat ‘sab ko og mga report nga mibalik ang video karera apan tinago-tago pa kuno. Mao na ang bug-at nga gipas-an karon ni Romana kay angay gayud niya nga imatuod sa katawhan nga sayop si Garbo sa pag-ingon nga tapolan siya sa kampanya sa illegal nga sugal.

Ang gipulihan ni Romana nga si Koronel Mariano Natuel maayo og rekords kay ang intelligence division ubos sa iyang pagdumala nakasakmit og kapin sa kilo nga shabu, unya daghan pa nga kalampusan.