Punishers kon ang magsisilot

Sa laing bahin, dunay mga ginikanan nga dili makapugong sa kaugalingon nga diyotay’ng sipyat sa ilang mga anak ang mohimo dayon og hinanaling pagsilot. Bunal diri, bunal didto. Kasaba diri, kasaba didto.

Apan ang nakapait kay dunay mga pagsilot nga moresulta hinuon sa pagkaguba sa tawo mismo. Kini tungod kay imbis ipunting ang sala sa bata gihimo naman hinuon nga ang silot naka-sentro sa pagkatawo mismo sa bata. Mura bag ang sala identical sa bata.

Adunay mga higayon nga ang akong pag-umangkon kay lagi mongaab dayon panahon nga kuyogan ko sa iyang apohan padulong sa eskina gikan sa amoa. Ang buhaton dayon sa apohan mao ang pag-ulog-ulog sa bata nga nakapasamot hinuon sa iyang pagmanya. Ang akong buhaton mao nga ako siyang ingnon: “Bilin lang ka diri sa balay kami lay adto sa eskina!”

Ang bata nga nasayud nga siya rang usa sa balay ug gabii na ang mohilom dayon punit sa iyang stuff toy dayon kuyog namo uban ang paggunit sa akong kamot. Sayud siya nga wala ako magtiaw.

Mao nga dili na ko kinahanglan pang mosinggaak ug mamunal. Kay nakondisyon ang bata nga ang resulta sa pagmanya sa mga sitwasyon nga sama niadto mao man ang pagbilin kaniya sa balay nga siya rang usa.

Mao nga diha usab sa pagsilot kinahanglan nga dili nato kini ipasibo sa atong emosyon.

Kinahanglan pinasikad usab kini sa lohika. Aron sa ingon dili mamahimong magrabehan ang bunal kun ikaw anaa sa kasuko ingon tang pagkasultiha. Siloti ang imong anak dili tungod kay nasuko ka. Siloti siya aron siya makamatngon sa iyang sayop.