Kalisang sa baha
Samtang nagpaingon sa tigom atol sa paniudto sa usa ka luhong hotel sa Dakbayan sa Sugbo, nakabantay kong managsama mi sa taxi driver nga nagsige og lingi sa baga nga dag-om sa habagatan ug kasadpan nga bahin sa kawanangan. Nagkadungan gani mi pagtan-aw sa basa na kaayong taxi gikan sa amihanang barangay sa Dakbayan sa Sugbo.
Pulos mas nilawom ang among ginhawa dihang nikisdom ang langit ug nagsugod og talisik pag-abot sa Panagdait nga maoy nahitaboan sa pagkabanlas sa pipila ka bay atol sa makalilisang nga baha niadtong Sabado sa gabii. Maayo na lang nga niabot na sa akong destinasyon pagsugod og kusog sa uwan.
* * *
Samtang naniudto akong mga katigom nagsige og tan-aw sa nagtokar-tokar nga uwan sa gawas. Ilang mga sugilanon naputos sa pait nga kasinatian dihang ilang mga kabanay natanggong sa baha sa niaging mga adlaw.
Bana sa akong katigom napugos pagkanaog sa wa na kairog nilang sakbayan ug nagbaktas pauli sa ilang bay nga gibahaan sa labing unang higayon sukad masukad aron pagtabang paghakot sa bililhon nilang kabtangan nga diriyot na maabot sa baha. Kaluha sa lain nakong katigom labihang kuganga pagkakita nga natangtang ang tibuok bumper apil nang plate number sa iyang sakyanan tungod sa kakusog sa sug sa baha. Maayo na lang nga giuli ra sab sa nakabangal nga molupyo paghubas na sa baha.
* * *
Paghuman sa among tigom nakaginhawa ko og luag nga nihinay nang uwan sa pagsakay nako og laing taxi pauli sa Jagobiao. Apan samtang nag-aginod kuyog sa bagang duot sa mga sakyanan atubangan sa Mabolo Barangay Hall nikusog ang uwan ug nagkadungan mi og panaguto sa drayber.
Nisamot kangiob ang palibot pag-abot namo sa Tipolo nga usa sa suki sa lawom nga baha. Maayo na lang nga pagkataudtaod nihunong ang uwan ug napadpad ang baga nga dag-om. Wa hinuon moduyog ang trapiko. Tagsa ra ka dangaw ang among irog samtang nagkaduol sa taytayan sa Butuanon.
* * *
Pagtungod namo sa Basak Elementary School kansang classrooms kinaham na sab sa baha, nikalit lang pagpakita ang adlaw. Labihang hayaga sa nasudnong highway nga nabantang pag-ayo sa mga motorista ug mga pasahero ang nagbuntaog nga mga imburnal morang nagpaabot gyod og tinguwan una mapahimutang.
Mas nihayag pa gyong adlaw pagdulhog na namo paingon sa ABS-CBN Broadcast Complex sa Jagobiao. Diha pa kong kabantay nga sa tibuok biyahe gikan ug paingon sa mga Dakbayan sa Sugbo ug Mandaue, daghang salamat sa mga pasidaan sa Pagasa sa pat-ak pat-ak nga pag-uwan ug sa kapakyas sa lokal ug nasudnong mga buhatan sa gobyerno pagtarung sa drainage system, gilikosan ko sa giisip nga labing bag-ong sakit nga nitakboy sa mga Sugbuanon: Ang kahadlok sa baha.
* * *
- Latest
