Sinsero ba si PNoy sa iyang panaway

Samtang gidayeg sa pangulo ang mga ordinaryo ug opisyal sa iyang gobyerno nga nakapakita og maayong performance sa ilang trabaho, iya usab nga gisaway ug gitawag pang mga baga og nawong ang ubang opisyal nga para niya walay ayo ang performance.

Sa iyang State of the Nation Address gisaway sa pangulo ang mga buhatan sa Bureau of Customs, Bureau of Immigration and Deportation ug National Irrigation tungod kay padayon gihapon ang smuggling ug corruption sa Bureau of Customs, nakagawas ang mga langyaw nga nag-atubang og mga kaso dinhi sa nasud ug lihay sa iyang mga pangutana ang administrator sa National Irrigation kun nganong walay dugang patubig nga nahimo ang iyang buhatan.

Pero wala lang kaha himoang salimbong ug sakripisyo ni pangulong Noynoy Aquino ang tulo ka mga buhatan sa iyang kagamhanan aron lang iyang mapakita sa katawhan nga wala siyay gisanto sa iyang paglimpiyo sa gobyerno? Sinsero gyod kaha si pangulong Aquino sa iyang pagpanglimpiyo sa iyang pamunoan maong iyang gisaway ang mga opisyal nga wala mouban kaniya ?

Kun sinsero man ang pangulo, nganong iya pa man nga gipabilin ang mga opisyal sa iyang pamunoan nga walay ayo ang performance? Nganong wala man niya kini tangtanga sa ilang katungdanan, kay iya pang gihatagan og laing kahigayonan? Dili pa ba diay igo sa pangulo ang tulo ka tuig alang sa iyang mga paborito nga makapakita sila sa unsay gipaabot kanila sa katawhan?

Sa Bureau of Customs, nganong gipabilin pa man sa iyang katungdanan si Commissioner Ruffy Biazon nga wala man kini makapahunong sa smuggling operation. Gani ang akong nahibaw-an, nagbuhi man hinoon kini og anino nga usa ka pribadong tawo nga maoy tigbunal sa mga players sa nahisgotang buhatan. Gani ang maong pribadong tawo perte ka gamhanan kay yano ra kaayo kining makapagawas sa mga gipanghiktan nga mga kontrabando. Ambot unsa ni ka tinuod. Seguro tinuod kay aduna may players nga miangkon nga siya upod gipatawag niining anino ni Commissioner Ruffy Biazon.

* * *

Bag-o na kuno ang Pilipinas matud pa sa pangulo sa iyang State of the Nation Address. Tinuod ang gisulti sa pangulo tungod kay bag-o naman ang minubo sa Philippines, gikan sa Phils ngadto na sa Phl o Ph. Gani adunay laraw ang ubang opisyal sa nasud nga usbon ang spelling sa Pilipinas ngadto na sa Filipinas. Kun madayon mosamot gayod katinuod ang gisulti sa pangulo sa iyang SONA. Nagbaligya na diay kita karon og bugas didto sa gawas sa nasud matud pa sa SONA sa pangulo. Maayo kini nga balita. Ang dili maayo kay namalit upod kita og bugas sa gawas. Pagka kingkoy! Mura ra ta sa mananagat nga gibaligya ang iyang kuha nga isda kay iyang ipalit og sardinas.