Daghan og kuwarta ang SSS, apan ..

Sa 2009, gibaligya sa SSS ang share ini sa Meralco ngadto sa Global 500 Investment sa kantidad nga P5.660 billion. Kadaghan ining kwartaha. I hope waa pa ni mahurot karon. Unya, matud ni Party-list Representative Neri Colmenares, adunay collectible ang SSS gikan sa delinquent nga mga employers mokabat og P45.billion. Nganong di man ni makoleka?

Dunay real estate ang SSS sa Bonifacio Global City, 8,300 sq.ms. nga kun mahalin, mokabat og P2.24 billion. Sa unang upat ka bulan niining tuiga, ang net income sa SSS miabot og P16.44 billion. Kadaghang kwarta ini.

Ug karon naglaraw ang SSS pagdugang sa ilang investments, sa natad sa telecommunications, banking, finance ug sa power,  kay mao kono kini ang “drivers of economic growth” sa atong nasud.

Very good. Apan, waa man sila maghisgot pagpausbaw sa pension sa mga sakop sa SSS. Ang gihisgutan, pagpausbaw man hinoon sa bayranan (pension) matag buwan!

Si Colmenares mipasaka og balaudnon nga mag-increase sa pension ngadto sa P7,000 matag buwan. Hinaut nga kahatagan kini’g priority sa SSS.

* * *

Giingon dinhi nga eating fruits and vegetables are tied to longer life. Bitaw, tan-awa nang mga Hapon, tag-as kaayo og kinabuhi kay ang ilang main menu utan, isda ug prutas. Daghan kaayo ni dinhi sa ato. Apan, sa atong kahambugero, ato kining gisalikway … ug mao nay atong pagkaon ang mga hamburger, sandwich, pizza, spaghetti, hotdog, ug unsa pa na diha nga Western-influenced nga mga pagkaon.

Hangtud nga ang ato karong mga batan-on, waa na kaila og kamunggay, okra, batong, agbati, sikwa, ubp. Pakapinan pa ni sa sigarilyo ug ilimnon nga makahubog … magpahubog ra ba gyud .. hangtod nga mag-ramble na hinoon, ug manghapak pag bato.

Busa, balik ta sa isda, prutas ug utan … aron madugaydugay ta ning kalibutan. Of course, panagsai lang pud ang humba ug lechon.

* * *

Ang gipangayo nga budget sa Malacañang alang sa tuig 2014, mokabat og P2.3 trillion. Kun imo ning iphon sa tag-mameso, ikaw rang usa, abtan tingali kag usa ka tuig pag-ihap ini. Ingon ini ka daghan ning kwartaha.

Hinoon, matud nila, walay pag-usbaw sa buhis, aron ma-realized ang maong kantidad. Good. Ug dakung pahat ini igahin alang sa infrastructure ug job generating projects.

Maoy tuyo nga kining nasinati karon sa Pilipinas nga economic growth, modagayday nganhi kanatong mga yanong lungsoranon, labi na sa mga poorest of the poor nga mga Pinoy nga dili na makakaon katulo sa usa ka adlaw.

Pagkakaron, ang mga benepisyo sa economic growth, sila ra didtong mga adunahan, mga dagkung negosyante ang nakapahimulos. Apan, kita dinhi, dili kay nagpabiling nag-ilaid sa tumang kalisud, kundili, misamot ang kawad-on. Sa laktud, makatilaw usab unta kita dinhi sa P2.3 trillion nga budget. Noy?