Hustisya o kwarta?

Hangtud karon wala pay gipasakang sumbong ang pamilya ni Jan Niño Pogoy, 16 anyos- nga gihapak og bato sa ulo. Ang gipasanginlan, sigun sa affidavit sa tulo ka mga kauban sa biktma, mao si Cebu City Councilor Gerardo "Gerry" Carillo.

Gipanghimakak hinoon ni Carillo nga siya maoy naghimo sa maong salawayong buhat. Apan sumala pa sa balita nga nihatag ang konsehal og hinabang salapi ngadto sa biktima nga gitunol sa sekretarya sa iyang abogado. Ngano man kaha?

Alang kanako mas makatabang unta sa biktima kun gidala pa ni Carillo ang nagkadugo nga biktima ngadto ospital sa dihang nahugno kini sa iyang atubangan.

* * *

Ako pang sabton ang mga ginikanan ni Jan Niño Pogoy ngano nga hangtud karon wala pa sila mopasaka’g kiha batok sa suspetsado nga si Konsehal Gerardo Carillo. Gipunting pa tingali nila ang ilang atensiyon ngadto sa pag-atiman sa ilang anak nga anaa pa sa talandugong kahimtang sa Vicente Sotto Memorial Medical Center. Tingalig ila pa usab nga gipaabut ang resulta sa imbestigasyon nga gihimo karon sa kapolisan.

Apan kun masuta na kun si kinsa ang naghimo niining linuog nga krimen angay lang nga mopasaka’g sumbong ang mga Pogoy aron sa paghatag og hustisya sa gidangatan sa ilang anak. Apan daghang nahadlok nga tingalig makig-areglo ang mga ginikanan sa suspetsado aron ikabayad sa ospital ug sa doktor nga nag-atiman kang Jan. Nagpanagana usab tingali sila nga makigbangga og tawong gamhanan.

Alang kanako ang dili pagpangita og hustisya maoy usa ka dakung pagpabaya sa ginikanan sa iyang katungod ngadto sa iyang minor de edad nga anak. Mas grabe pa kini sa kalapasan sa Presidential Decree 603, kon Child and Youth Welfare Code.

Dili na angayang maglibog ang mga ginikanan ni Jan kun unsay ilang palabihon- hustisya ba o kwarta.

Ang pagpangayo’g hustisya maoy makasumpo sa abuso sa mga gamhanan samtang ang kwarta maoy makapahimo nilang abusado.

* * *

Pagkawalay uwaw niining mga senador ug mga kongresista nga nagpagamit niining Janet Lim Napoles, president and chief executive officer sa JLN Corp.

Si Napoles naghimog mga dummy kon mini nga mga non-government organizations (NGOs) aron makabulsa og katunga sa pork barrel sa lima ka mga senador ug 23 ka mga kongresista.

Nagtoo ako nga madugangan pa ang gidaghanon sa mga ngalan sa mga magbabalaud niining pagpadayon sa imbestigasyon sa National Bureau of Investigation (NBI).

Nabulsa ni Napoles ug sa mga magbabalaud mokabat og P10 bilyones sud sa 10 ka tuig nga panapi hangtud nga nabunggo kini karong bag-o. Ang mga senador mao sila si Bong Revilla, kanhi senate president Juan Ponce Enrile, Jinggoy Estrada, Bongbong Marcos ug Gringo Honasan. Ginganlan usab ang mga kongresista nga niapil niining P10 bilyones nga racket.

Mao diay nga bisan unsa ka daghang salapi ang nakobra unta sa gobiyerno wala lang gihapoy alibiyo ang kahimtang sa atong mga kabus nga kaigsoonan. Sa P10 bilyones ambot og nakaabot ba og P10 milyones ang nadapat sa mga proyekto sa atong gobiyerno.

Sumala gud sa mga whistleblower nga wala gayuy delivery sa mga palitonon unta alang sa mga mag-uuma ug mananagat ingon man sa ubang mga proyekto kay deretsohon man lang dayon og bahin ang salapi gikan sa pork barrel sa mga magbabalaud ug Napoles kun ma-release na kini. Apan nganong pulos man oposisyon ang gipasanginlan ug wala may sakop kon alalay sa Liberal Party? Gitago ba ang ilang mga ngalan?

Kinahanglang pahamtangan og labing bug-at nga silot kining mga makasasala kay nagpangagot na ang ngipon sa mga tawo labi na ang mga kabus.

* * *

Nahiubos kuno kanako ang akong mga higala nga suod sa kasingkasing ni Konsehal Gerry Carillo ug inahan sa babaye nga giingong maoy tag-iya niadtong imnanan nga gipukpok ang ulo ni Jan Niño Pogoy taliwa sa usa ka "rumble."

Daghan na kaayo sila og pangulipas ug katarungan human nabulgar nga wala diay business permit ug Liquor Licensing Commission permit, nakalapas sa anti-noise ordinance ug namaligya’g ilimnong makahubog ngadto sa mga minor de edad ang maong imnanan. Nasirhan na hinoon kini.

Akong ipahibawo ngadto sa akong mga higala nga wa akoy tumong ug tuyo sa pagdaut ug pagpasakit kanila kun dili ako lang gikutlo ang mga balita sa mga reporter nga napatik sa nagkalainlaing pamantalaan ug ang mga report sa radyo ug sa among kaugalingong reporter sa telebisyon.

Ako lang kining giapilan og ginagmay nga analysis kon komentaryo kay maoy format sa among programa "Hello Cebu, Maayong Buntag Pinoy" uban kang Ms. Malou Inocando Tabar matag buntag sa CCTN Channel 47 gikan sa adlaw’ng Lunes ngadto sa Biyernes. Ako gihapong giila ang among panaghigala, mao man gani nga wa gayud ko mohisgut sa ilang mga ngalan, apan ang akong gihimo dili personalan kun dili trabaho lang.

* * *

Email:[email protected]